Assi: KNR

Tele-Post aningaasartuuteqangaatsiassaaq

Sakkortusaavinnut, kabelip immap naqqatigoortup tallineranut Namminersorlutillu Oqartussat iluanaarutissaannut atorneqartussanut Tele-Post 1,1 milliardit koruuningajannik aningaasartuuteqassaaq. Aningaasat taakku oqarasuaatinik angallattakkanik atuisunit akilerneqassasut, ingerlatseqatigiiffimmi pisortaaneq oqarpoq.

Tele-Postip 2020-p tungaanut suleriaasissani anguniarlugit aningaasarpassuit atussavai.

 - Innuttaasut ullumikkumit pitsaanerusumik sullinneqalernissaat nunalu tamakkerlugu sullissilluarnerunissarput, anguniakkani pingaarnersaapput, Tele-Postimi pisortaaneq Kristian Reinert Davidsen oqarpoq.

Tele-Postip 2020-p tungaanut suleriaasissaani sinerissami atuisut 92 procentiisa Nuummisut sukkatigisumik internetikkut atugaqalernissaat siunertaavoq.

- Kujataani Nanortalimmiit Avannamut Upernavimmut.

800 millionit koruunit kabelimut sakkortusaavimmullu

Kabeli immap naqqatigoortoq Maniitsumut, Sisimiunut Aasiannullu tallineqarniarpoq. Imaatigut kabelip saniatigut Aasianniit Qasigiannguanut sakkortusaavimmik annertuumik pisinnaasalimmik pilersitsinissaq pilersaarutaavoq. 

Pisortaaneq naapertorlugu ukiuni sisamani aningaasartuutigineqartussat 800 millionit koruuninik missingersorneqarput.

Taassuma saniatigut Namminersorlutik Oqartussat 378 millionit koruuninik ukiut sisamat ingerlanerini iluanaaruteqassapput.

- Aningaasaliinissamut pilersaarummut aningaasanik matussusiisussanik ujartuissaagut, pisortaaneq oqarpoq.

Tele-Post suliniummik naammassisaqassaguni 400 millionit koruuninik taarsigassarsiniassaaq.

Atuisut akiliissapput

Taarsigassallu akilerneqalerpata atuisut akiliissapput.

- Aningaasalersornissaannut periarfissarput ataasiinnaavoq, tassalu aningaasat atuisunit aaneqarnissaat, Tele-Postimi pisortaaneq Kristian Reinert Davidsen oqarpoq.

Tele-Postip mobilitigut attaveqaatinik atuisut iluanaaruteqarfiginerussagai, pisortaaneq paasissutissiivoq. Neriuutigaali ullumikkut akigitinneqartut qaffanneqassanngitsut. 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat