Tekle Ghebrelul sungiusaasumut ikiortinngussaaq

- Tekle Ghebrelulip angutit nunanut allanut unammisartui peqatigeqqilerai nuannaarutigeqaarput.

Kalaallit Arsaattartut Kattuffiat taama nalunaaruteqarpoq.

Taamaalilluni KAK-p sungiusaasut ilinniarsimasumik aammaarluni ilavai.

AAMMA ATUARUK Tekle Ghebrelul Sverigemut nuuttoq

- Sungiusaasugut suleqatigiiussasut nukittuut misilittagaqarlutillu qaffasissumik ilinnigaqarsimassasut pingaartipparput. Teklelu tassunga tulluarluinnarpoq, taassumami nunatsinnut attaveqarnera immikkuullarissuuvoq, KAK-milu illup iluani arsaannermik ineriartortseqataalluarsimalluni. Taamaammat toqqarneqarnera pissusissamisoortutut isigaara, John Thorsen, KAK-mi siulittaasoq oqarpoq.

Qilanaaqaanga

Aamma sungiusaasutut ikiortinngortussap Tekle Ghebrelulip tamanna nuannaarutigaa:

- Qilanaaqaanga, nunat assigiinngitsut akornanni piffissami kingullermi ilikkarsimasama ingerlateqqinnissaat aamma qilanaarinerpaasama ilagaat. Soorlu aamma nuna tamakkerlugu unammisartut, klubbit pikkoriffippassuillu inerisarnissaat qilanaarigiga, Tekle Ghebrelul oqarpoq.

AAMMA ATUARUK Nunanut allanut unammisartut Teklep soraarsitaanera kamaatigaat

Tekle Ghebrelul Sverigemi Örebromi ullumikkut najugaqarpoq. Sverigemi illup iluani isikkamik arsaattartunut ÖSKs SFL-imut sungiusaasuuvoq.

Tekle Ghebrelul angutinut nunanut allanut unammisartunut 2017 tikillugu sungiusaasuuvoq, KAK-p taamani siulersuisuini amerlanerussuteqartunit soraarsitaalluni. Soraarsitsineq nunanut allanut unammisartunit arlalinnit akerlerineqarpoq, kattuffiullu siulittaasua John Thorsen soraarsitsinermut akerliulluni siulittaasutut tunuarluni.

John Thorsen kattuffimmut 2017-ip ingerlanerani siulittaasutut atuuffeqaqqilerpoq.

AAMMA ATUARUK GBU-mi siulittaasoq soraarsitsisoqareersoq tunuarpoq