Nunanut allanut unammisartut Teklep soraarsitaanera kamaatigaat
Unammisartut ’GBU-mi mamianartuliornermik’ taasaminni pisoq oqaaseqarfigisariaqarlugu nalunaarumminni pingasunngornermi ualikkut nassiussaminni allappaat.
- Sungiusaasutta Tekle Ghebrelulip soraarsitaariataarnera kinguneratigullu sungiusaasup Rene Olsenip kiisalu GBU-mi maanna siulittaasuusimasup, John Thorsenip soraarnera aliasuutigaarput. Tassami kalaallit isikkamik arsaannermi nunanut allanut unammisartuini atatitsinerpaallutillu taarserneqarsinnaanngitsuupput.
Nunanut allanut unammisartut sungiusaasuata soraarsitaaneranut Rene Olsen John Thorsenilu akerliullutik atorfitsik sapaatip akunnerata siuliani qimappaat.
AAMMA ATUARUK Sungiusaasup soraarsitaanera aalassaataasoq nunarsuaq tamakkerlugu allaaserineqartoq
GBU-p siulersuisuini amerlanerussuteqartut Tekle Grebrelulip timersortartorpalaanngitsumik tusagassiutinilu saqqummertarnera tunngavigalugit soraarsippaat. Tamatumanilu nassuiaataasut nunanut allanut unammisartut akuerisinnaanngilaat.
- Uagut ilisarisatsitut sungiusaasugut Tekle Renelu taakkuluunniit immikkoorlutik nunanut allanut unammisartuni ukiuni taakkunani sungiusaasorineranni uagutsinnut allalluunniit sungiusaaffigisimasatik timersortartorpalaanngitsumik pissusilersuuteqarfigisimanngilaat. Siulersuisut qanoq ilillutik Teklemik soraarsitsinersut uagutsinnut paasiuminaappoq.
AAMMA ATUARUK Isikkammik arsaattartunut sungiusaasoq soraarsitsisoqarnera akerleralugu tunuartoq
GBU soraarsitsinermut arlalinnik tunngavilersuuteqarpoq. Ilaatigut upernaaq futsalimi GM-ertoqarnerani pisoq, Tekle Grebrelulip nukappiaqqamik Tekle naapertorlugu ammip qalipaataa pillugu immikkoortitsilluni nilliasoq tigusimammagu tunngavilersuutigineqarpoq.
Pisumili tassani susoqavissimanera uppernarsaruminaappoq. Taamaammat GBU-p soraarsitsinerminut tamanna tunngavilersuutigimmagu ’kukkuluttornerusoq’ nunanut allanut unammisartut isumaqarput.
AAMMA ATUARUK GBU-mi siulittaasoq soraarsitsisoqareersoq tunuarpoq
GBU-p pisut allat eqqaavai nunanulli allanut unammisartuni arsaattartut Tekle Grebrelulimut pasilliutigineqartut pisuussutigineraanut uppernarsaatit amigarsoraat.
- Nunanut allanut unammisartutut ajoraluartumik misigilerpugut oqaluttuat paasissutissartaat uukapaatitsiniarnermik ilaqartut. Oqaatigineqartut arlaqartut uppernarsarneqarsinnaanngillat.
Arsaattartut arlaqartut arsaannerup silarsuaani pisoqangaatsiarneratigut nunaminni taama pissutsit itsillugit ataqqinniinnassanerlutik eqqarsaatersuutigilerpaat.
- Matumuuna pisumi siulittaasut ingerlatsinerlunneranni nunanut allanut unammisartutut inissisimaannassanerluta eqqarsaatersuutigingaatsialerparput, neriuppugullu siulersuisut tamavimmik tunuassasut Kalaallit Nunaannilu arsaannerup ineriartorluaqqinnissaanut qulakkeerutissamik nutaanik siulersuisortaassasoq.
Arsaattartut marluk namminneq soqutigisatik tunngavigalugit oqaaseqaammi ilaajumanngillat arsaattartulli sinneri aasaq Island Gameseqataasut peqataapput.
Oqaaserisaat uani atuarneqarsinnaavoq (malugiuk danskisuinnaq allassimavoq) :
udtalelse2.docx
