Tatiginnikkunnaarnermik taasisitseriaraluarneq pinngitsoortinneqarpoq
Tatiginnikkunnaarnermik taasisitseriaraluarnermi tunngavigineqarpoq qallunaat Naalakkersuisuisa Nunarput sinnerlugu Naalagaaffiit Peqatigiit innarluutillit pillugit isumaqatigiissutaat Nunatsinnut atuuttussanngortissimammassuk, naak Nunarput tamatumunnga akuerseqataanngikkaluartoq.
Tatiginnikkunnaarneq Siumumit aamma Atassummit tunngavilersorneqarpoq, Mimi Karlsenip tamanna maajip 29-anili ilisimasimagaluarlugu Inatsisartunut nalunaarutigisimanngimmagu.
Tatiginninngikkunnaarnermik taasisitseriaraluarnermut aqqaneq-marluk isumaqataanngillat quligiluallu isumaqataallutik, tassalu taamaalilluni Inuit Ataqatigiit, Demokraatit aamma Kattusseqatigiit Partiiata tatiginninngikkunnaarnermik taasisitsineq pinngitsoortippaat. Taakku tunngavilersuutigaat, Mimi Karlsenip isertuussinissaq siunertarisimanngikkaa.
Demokraatit Inatsisartunut ilaasortaatitaata, Niels Thomsenip ataasinngormat paragraf 37-i aqqutigalugu apeqquteqarnermini Mimi Karlsen assut isornartorsiorpaa allalluni imatut:
- Innarluutillit pillugit Naalagaaffiit Peqatigiit isumaqatigiissutaat assut tapersersornartippara, tamassumali allanngunngilaa, qallunaat naalakkersuisui assut ilungersunartumik kukkusimammata, puigornikkut Kalaallit Nunaat tunuarsimaarfigisimannginnamikku.
- Aamma taamatut ajuusaarnartigigajappoq, Inatsisartut aatsaat massakkut paasitinneqarsimammata, isumaqatigiissut atortussanngortinneqarsimasoq Kalaallit Nunaannut atuutilerluni. Ilaqutariinnermut, Kultureqarnermut, Ilageeqarnermut Naligiisitaanermullu Naalakkersusiq Mimi Karlsenip tamanna maaji 2011-mili ilisimasimavaagooq aatsaalli septemberip naalernerani Inatsisartut ilisimatissimallugit.
Tatiginninngikkunnaarnermi taasititsitseriaraluartoqarnerani Niels Thomsen Inatsisartut ataatsimiittarfianni isersimanngilaq, naak allaffimmini issiagaluarluni. Sooq peqataannginneranik apererusussimagaluarparput, oqaaseqarusunngilarli.
