Tasiilarmiut siullerpaamik isikkamik arsaannermi pissartanngortitsipput

ATA Tasiilameersup arsaattui nuannateqaat niviarsissat U-15-it GM-qarneranni finalemi dommeri naggataamik tallimanngortumi tannaartumi siggarmat.

ATAp Siuteroq-43 14-0-mik ajugaaffigaa taamalu oqaluttuarisaanermut ilanngullutik. Tassami siornatigut Nunatta kangianeersut isikkamik arsaannermi pissartanngorniunnermi pissartanngortoqarnikuunngillat.

- Niviarsiaqqat soorunami nuannaaqaat. Sinnattoralugulu piffissami sivitsortumi oqaluuserisarpaat. Tassa septemberimi sungiusarluta aallartikkattali eqqartulerpaat, ATA-mi sungiusaasoq Sune Larsen KNR-mut oqarpoq.

Taanna qallunaajuvoq ukiunilu 20-ni arsaannermi Danmarkimi sungiusaasutut misilittagaqarluni.

Suli sungiusarusuppai

- Arsaannermik taama nuannarisaqartigisunik takunikuunngilanga. Arsaannermi paasinnipallallaqqissorujussuupput, taamaattoq sungiusaasoqarnikuunnginnamik aaqqissuussaasumik arsartanngikkaluarlutik. Uanga suliassara tassaaginnarsimavoq aaqqissuussaasumik arsaattalersinnissaat, Sune Larsen oqarpoq.

Niviarsissat ATA-meersut arlallit U-15-ni naggataarput. Tasiilarmiullu inuusuttunnguleraangamik atuariartorlutik aallartalersarput. Taamaattoq sungiusaasup suli sivisunerusumi sungiusarusuppai.

- Uku niviarsissat U-18-ni GM-rtuni unammiartikkusussinnaavakka. Oqareernittut arsaannermik paasinnillaqqipput arsaannerlu nuannerisorujussullugu, Sune Larsen oqarpoq.

N-85 Narsameersoq bronzennappoq K-33 Qaqortumeersoq bronzennanniunnermi ajugaaffigalugu.

Nukappiaqqat U-15-it Tasiilami GM-rneranni B-67 Nuummeersoq pissartanngorpoq SAK Sisimiuneersoq finalemi ajugaaffigalugu. ATA Tasiilameersut bronzennappoq K-33 Qaqortumeersoq bronzennanniunnermi ajugaaffigalugu.