Tasiilaq aatsaavik kitaaniit arsiffigitilerpoq
NÛK-mi angutit utoqqasaat Dash 8-mi qiterutit sukaterluariarlugit februarip naalernerani Tasiilamut futsaleriassapput iligiit Tasiilap eqqaamiut unammiartorlugit
Taamaasiorniarput iligiit tunumiut unammiartorlugit. Arsaannissat saniatigut dommerinik pikkorissaasoqassaaq aammalu meeqqanut inuusuttuaqqanullu saqqummiisoqarlunilu sammisassaqartitsisoqassalluni.
Angalanissamik isumassarsisup aallarnissap iluatsilernera nuannaarutigaa.
- Tasiilaliarnissamik isumassarsiaq decemberimi Paamiuniinnitsinni pilerpoq. Aamma tupaallaatigaarput piffissap sivikitsup iluani angalanissatsinnut aningaasat naammatsimmata, angalanissamik isumassarsisoq Lars Kilime KNR-mut oqarpoq.
Tikeraartitsisussat Tasiilami arsaattartut peqatigiiffianni ATA-meersut aamma qilanaarput.
- Aatsaavissuaq arsaannermi iligiinnik kitaaneersunik Tasiilamut tikittoqassaaq. Taamaattumik tikeraartussavut NÛK-meersut qilanaareqaagut, ATA-mi siulittaasoq Aron Kristiansen oqarpoq.
Angutini utoqqasaani arsaattartut tassaapput 30-it sinnerlugit ukioqalereersimasut.
Angalaneq akisooq
ATA aamma iligiit allat tunumeersut ukiorpassuit ingerlaneranni kitaanukaqqaarlutik iligiinnut allanut unammisarput.
- Kitaanut angalasarneq akisuvoq. Assersuutigalugu iligiit ikinnerpaamik qulinik arsartullit angalanerat 100.000 koruunit sinnerlugit akeqartarpoq, Aron Kristiansen oqaluttuarpoq.
Tasiilami arsaannissanut iligiit arfineq marluk peqataassapput unamminerillu februarip 24-at aallartissapput. Iligiit tassaapput Nuummeersut, Kulusumeersut, Kuummiormiut aamma Tasiilarmiut.
- Soorunami coronamut malittarisassat naapertorlugit inuit timersortarfimmi isersimasut nakkutigissavagut. Aamma Facebook aqqutigalugu live-rtitsinissaq piareersarparput, Aron Kristiansen oqarpoq.
NÛK-mi angutit utoqqasaat angalanissanut katersuiniartarneq misilittagaqarfigilluarpaat. Iligiit arlaleriarlutik Islandimeereerput aammalu eqqaaneqareersutut Paamiuniillutik.
- Katersuiniartarnermi misilittakkanik tunumiut avitseqatigerusuppagut suleriaatitsinnillu saqqummiiffigissamaarlugit, Lars Kilime naggasiivoq.
