Ilaqutariinnermut ataatsimiititaliap kommuni utaqqimaaqqaarniarpaa
Ilaqutariinnermut Peqqissutsimullu Ataatsimiititaliap, Kommuneqarfik Sermersooq ataatsimeeqatigeqqaartinnagu, Tasiilami isumaginninnikkut ajornartorsiuterpassuit isummerfiginianngilai.
Ataatsimiititaliami ilaasortat DR-ip piviusulersaarutaa, ataasinngornermi aallakaatinneqartoq, “Byen hvor børn forsvinder" marlunngornermi ataatsimiissutigaat.
Aallakaatitaq attaveqaqatigiittarfinni politikerinillu oqallitsitseqaaq.
AAMMA ATUARUK Politikkikkut ikioqatigiikkusunnginneq meeqqanik eqquivoq
AAMMA ATUARUK Avataanit ikiorneqarnissaq pisariaqanngilaq
Ilaatigut Inuit Ataqatigiit Folketingimut ilaasortaatitaat, Aaja Chemnitz Larsen, Kommuneqarfik Sermersuumilu borgmesteri, Asii Chemnitz Narup, Tasiilami pissutsit pillugit isummereerput.
Aamma Kommuneqarfik Sermersuumi borgmesterip tullersortaata Randi Vestergaard Evaldsenip marlunngornermi nassuerutigaa kommunip isumaginninnikkut suliassanngortinneqarsimasut naammaginanngitsumik suliarisimagai erseqqissaatigalugulu politikerit kisiisa ajornartorsiut aaqqissinnaanngikkaat.
Ilaqutariinnermut Peqqissutsimullu Ataatsimiititaliap, marlunngornermi ataatsimiinnginnerminni, ataatsimeereernerup kingorna oqaaseqarniarlutik paasissutissiissutigigaluarpaat.
Aaqqiissutaasussalli sorpiaat kommunimit ujartorneqarnersut paaseqqaarusukkitsik, ataatsimiititaliami siulittaasoq Laura Táunâjik (S) erseqqissaavoq.
Ataatsimiititaliap kommuni piaartumik ataatsimeeqatigiumagaa, siulittaasoq oqarpoq.
AAMMA ATUARUK Kommuneqarfik Sermersooq Tasiilami pissutsit pillugit nassueruteqartoq
