Tasiilami sulisut allamik atorfeqalernissaannik neqeroorfigineqartut
Atuartut nunaqarfimmiut angerlarsimaffianni, ulluuneranilu paaqqinnittarfinni sulisut ilaat allami suliffittaarnissaat Kommuneqarfik Sermersuup neqeroorutigisimavaa, Tasiilami meeqqanik ulluunerani paaqqinnittarfinni suliffittaarnissaminnut ilaatigut neqeroorfigineqarsimallutik:
- Nunaqarfinni atuartut Tasiilami angerlarsimaffianni, taamatullu atuarfimmi nerisat pitsaanerulernissaat anguniarneqassasoq kissaatigaarput. Tassalu tamanna sulariumannittussarsiuunneqarluni. kikkut tamassuminnga sullississanersut aalajangereernermi, sullissisussat nutaat sulisunik amerlasuunik atorfissaqartitsinngillat, taakkuli uagut atorfissaqartippagut, soorlu Tasiilami meeqqanut inuusuttuaqqanullu sullissinerup iluani, Kommuneqarfk Sermersuup maanna annertusaaffigisaani, Kommuneqarfik Sermersuumi ilaqutariinnut, atuarfeqarnermullu ingerlatsivimmi pisortaq Jesper Madsen oqarpoq.
Sulisut allami sulilersinnaanissamut neqeroorfigineqartut akissarsiaat, atorfininnermilu isumaqatigiissutaat allanngortinneqassanngitsut kommunip nalunaarutigaa.
Meeqqanilli pinerliisimannginnermut uppernarsaammik takussutissaqarnissaq nutaamik atorfeqalernermi piumasaqaataavoq.