Tasiilami suliffissaaleqisut 15-it Avannaani suliffittaartut
Taassuma saniatigut Royal Greenland tunisassiornermi sulisunik Kalaallit Nunaata avannaani amigaateqarpoq. Taamaattumik Kommuneqarfik Sermersooq suliffeqarfissuarmut attaveqarsimavoq isumaqatigiissummillu angusaqarluni taamaaliornikkut Tasiilami suliffissaaleqisut Kalaallit Nunaata avannaanukarlutik Royal Greenlandimi piffissaq aalajangersimasoq suliartorallassapput.
Kommuneqarfik Sermersooq nittartakkamini taama allaaserisaqarpoq.
Piffissami aalajangersimasumi sulisussaaleqisartut
- Nuannaajallannaqaaq inuit suliffissarsinissaannut nutaanik aaqqiissutissanik isumatuunillu ikiorsinnaagutsigit. Nunatta sinnerani akuttunngitsumik piffissami aalajangersimasumi sulisussanik amigaateqartoqartillugu pisariaqanngilaq Tasiilami suliffissaaleqisut ikiorneqarsinnaanngippata, Kurt Pedersen Kommuneqarfik Sermersuup Tasiilami immikkoortortaani suliffeqarnermut siunnersortit pisortaat oqarpoq.
Piffissami matumani Tasiilami suliffissaaleqisut qulit aallakaapput. Namminersorlutik Oqartussat ataanniittoq Nuttarsinnaanermut aningaasaateqarfik ikiortigalugu suliffissaaleqisut allat tallimat Uummannap pigisaanut tunisassiornermik suliaqariartorlutik aallassapput.
Nuttarsinnaanermut aningaasaateqarfik ikiortigalugu Kommuneqarfik Sermersuumit ingerlaavartumik alapernaanneqassaaq kommunimi innuttaasut amerlanerit najukkatik qimallugit sulilersinneqarsinnaanerat.
