Tasiilami Piterarnissaa ilimasaarutigineqartoq: Atuarfik paaqqinniffiillu matupput

Anori, aput Canadamiillu issi.

Nunatta kimmut sineriaani sila taamaappoq, Tasiilamilu piterarnissaata ilisimasaarutigineqarnera pissutigalugu illoqarfiup ilaa matuneqarpoq.

Anori, aput issittullu issia Nuummi sineriatsinniluunniit ajornerusumik ajutoornerannik kinguneqanngitsut, Kalaallit Nunaanni Politiit nalunaarutigaat.

AAMMA ATUARUK DMI Canadami issinnera pillugu: Nuummi Qaanaamit nillernerusutut misiginarpoq

Air Greenland aamma timmisartuussileqqippoq, illoqarfinnili Nuummi, Sisimiuni, Ilulissani, Qaarsunni, Uummannami Upernavimmilu kinguaattooqqasoqarpoq.

Tasiilami atuarfik matuneqartoq

Qaanaami 25-t 35-llu akornanni issippoq, nunatta kitaata sinnerani nittaalaqattaarpoq issinneralu 8-p 25-llu akornanniilluni. Nuialaanngikkuni nuiatarasaassaaq.

Kujataani 20-t tikillugit issittarluni, nuianerussaaq nittargertarsinnaajumaarlunilu.

Tunumi piterassangatinneqarpoq, avannaq-kippasimmit anorsarinngikkuni anorersuannguussinnaasumik anoreqartarsinnaajumaarluni, allaat anorersuarujussuannguuttarsinnaassalluni. Unnuaru anorersuannguuttarsinnaassaaq.

Taamaammat Tasiilami atuarfik, ulluunerani paaqqinniffiit kommunillu allaffia ullumi ataatsimut matupput. Ullunimi tulliuttuni piterarnissaa ilimasaarutigineqarpoq, sisamanngornerlu ilanngullugu matoqqatinneqassarpasittut, kommunimi attaveqatigiinnermut pisortap, Lars Damkjærip oqaatigaa.

Meeqqat paaqqinnittarfinniittut amerlanerit angajoqqaaminnit aaneqareersut, sinnerilu paaqqinnittarfimmi sulisunit biiliunneqarlutik angerlaanneqareersut, Lars Damkjær oqaatigaa.

Ittoqqortoormiini tallimat qulillu akornanni issippoq, natsimaninnguussinnaasumillu anoreqartarsinnaassangatinneqarluni.