DMI Canadami issinnera pillugu: Nuummi Qaanaamit nillernerusutut misiginarpoq
Apillunilu anorlerpoq.
Nuummi Qaanaamit nillernerusutut misiginarpoq, DMI nalunaaruteqarpoq. Timmisartut kinguaattooqqapput, Sarfaq Ittulu sinersortaat Maniitsumiit kinguaattoorluni aallarpoq.
Nunarput januaarimi ississuaalerpoq. Kimmullu sineriammut Canadamiit nillertumik anorlerpoq.
Innuttaasut persersumi anissagunik erseqqarippallaannginnera pissutigalugu mianersussasut Kalaallit Nunaanni Politiit ippassaq unnukkut kaammattuutigaat.
Ataasinngornermi ullaap tungaani silap qanoq innera
- Qaanaaq: minus 28-35 gradit.
- Nuuk: minus 19 gradit.
- Sydgrønland: minus 7-13 gradit.
- Tasiilaq: minus 2-7 gradit.
- Ittoqqortoormiit: minus 7-12 gradit.
Silallu ajornera pissutaalluni annertuumik ajoqusertoqaranilu ujaasisariaqartoqanngitsoq, politiit ataasinngornermi ullaakkut nalunaarutigaat.
Canadami Nunavummi 60-inik issittoq
Air Greenlandip timmisartuussineri ingerlapput, sumiiffinnili qassiiusuni kinguaattooqqapput: Nuummi, Kangerlussuarmi, Sisimiuni, Maniitsumi, Ilulissani, Paamiuni Aasiannilu ilaatigut kinguaattooqqasoqarpoq.
Canadamit anori nillerpoq, tamannalu kimmut sineriammut maannakkut siorsuppoq. Sapaatip akunnerata naanerani Nunavummi 60 gradip missaannik nillerpoq.
Qaanaami -28 gradinik nillerpoq, anoreqarpallaaranilu. Nuummili -18 gradinik nillerpoq, anorilli sekundimut 7-8 meteriunerat pissutigalugu 35-nit 40-nut nillertigisutut misiginarpoq.
- Taamaammat Nuuk Qaanaamiit nillerneruvoq, Marianne Lauritsen DMI-mi silasiortoq oqarpoq.
Nunatta kujataani 13 gradit tikillugit sillerpoq – anorlerneralu pissutigalugu tamanna 22 gradimik nillertigineratut misiginarpoq.
Issinnissaali sivisuallaassanngilaq.
- Pingasunngorpat ualikkut anorlernikinnerulerlunilu nittaalaqattaarunnaassaaq, silasiortoq, Marianne Lauritsen oqarpoq.