Meeqqat illersuisuat: Tasiilami aaqqiigallartarneq ilisarnaataasimavoq
DR-ip Tasiilami meeqqat inuusuttullu atugaat pillugit piviusulersaarutaa “Byen, hvor børn forsvinder” ataasinngornermi unnukkut aallakaatinneqareersorlu oqallittoqangaatsialerpoq.
Meeqqat illersuisuata, Aviaja Egede Lyngep Tasiilaq qasseeriarluni tikeraarpaa, illoqarfimmilu tarnikkut ikiorneqangaatsiarnissaq pisariaqartinneqartoq taassuma oqaatigaa.
- Tasiilamut atatillugu tarnikkut ikiorneqarnissaq pisariaqartinneqangaatsiartoq eqqaamassavarput, maannakkullu pisariaqartinneqarluinnarpoq, Aviaja Egede Lynge oqarpoq.
AAMMA ATUARUK Kommuneqarfik Sermersooq Tasiilami pissutsit pillugit nassueruteqartoq
Tasiilami ajornartorsiutaangaatsiartut pillugit politikkerinit aaqqiissutissanik ataavartumik suliaqartoqarsimannginnera meeqqat illersuisuata isornartorsiorpaa.
- Inuiaqatigiinnit nukippassuaqarpoq, suliassarli nuanneqimmat ajoraluartumik aaqqigallartarlutillu ikuallannernik qamisaasarput, meeqqat illersuisuat oqarpoq.
Pitsanngoriaateqanngitsoq
Aviaja Egede Lynge Tasiilamut 2016-imi tikeraarnerminut atatillugu nalunaarusiaqarpoq, tassani illoqarfimmi meeqqat affaat kommunimi isumaginninnermi suliani ingerlasuniittut inerniliuppaa, taamanerniillu pitsanngoriaateqartoqarsimanngitsoq DR-ip piviusulersaarutaata takutippaa.
AAMMA ATUARUK Tasiilaq: Atsiornernik katersisoqaraluartoq isumaginninnikkut siuariartoqanngitsoq
Peqqinnissamut, Isumaginninnermut Inatsiseqarnermullu Naalakkersuisoq, Martha Abelsen marlunngornermi aamma taama oqaaseqarpoq.
- Ajornartorsiutit qanoq aaqqiiviginiarnissaat paasiniarlugu innuttaasut qanimut suleqatigissavagut, Martha Abelsen KNR-imut oqarpoq.
Tasiilami meeqqat pingasuugaangata ataaseq kinguaassiutimigut atornerlunneqarsimasartoq, isiginnaagassiami piviusulersaarummi oqaatigineqarpoq.
Nunaqqataasut peqataaraarusupput
Taamaammat ajornartorsiutit iluarsineqassappata politikerit innuttaasunik qanimut suleqatiginnissasut meeqqat illersuisuata kaammattuutigaa.
Meeqqat illersuisuata Tasiilamut 2016-imi tikeraarnermini sumiginninnaanermik atornerluinermillu ajornartorsiuteqarnermut innuttaasut qanoq iliortoqartariaqarsorineraat apeqqutigaa.
Oqariartuullu matumani ersarippoq: Aaqqiissutissiarineqartuni peqataatinneqarusupput.
AAMMA ATUARUK Ilaqutariinnermut ataatsimiititaliap kommuni utaqqimaaqqaarniarpaa
- Inuit nukittuffii aallaavigineqarnerusariaqarput. Nukittuffigisatik piorsarsimassutsiminniinnerarpaat. Akisussaaffimmik annerusumik tigusinissatillutik ataqatigiissuupput. Aammattaaq kinaassusertik, eqqarsartaasertik inooriaaertillu aallaavigerusuppaat, Aviaja Egede Lynge oqarpoq.
Assersuutigalugu Tasiilarmiut eqimattakkaarluni ilinniaqatigiinneq nuannarisorujussuuaat, iluarsiiniarnerminnilu tamanna ilaatikkusuppaat.
- Angajoqqaajunermut allanullu atatillugu suliniuteqariartortoqarpat, taava eqimattamiillutik ilikkaruminartitsinerupput, saqqummiinerinnaanngitsumillu iliuuseqarnikku5t ilinniarusupput, meeqqat illersuisuat oqarpoq nangillunilu:
- Innuttaasut soorlu Tasiilamisulli qanimut suleqatigineqaleraangamik innersuussutitsialannik iluaqutaasorisaminnik saqummiussuisarput.