Tartupaluk pillugu isumaqatigiissut nunatsinnut tunniunneqartoq
Nunatta Canadamut killeqarfianut allagartaq nunatsinniilerpoq.
Isumaqatigiissut nunanut allanut tunngasunut naalakkersuisumit, Vivian Motzfeldtimit (S) aamma Naalakkersuisut siulittaasuannit, Múte B. Egedemit (IA) Canadami Ottawami siorna juunimi atsiorneqarpoq. Canadamiut nunanut allanut tunngasunut ministeriata, Mélanie Jolysip atsiornera aamma allagartamiippoq.
Killeqarfimmik isumaqatigiissut Tartupaluk pillugu ukiuni 50-ini saqitsaassutaaneranut unitsitsisuuvoq.
Tartupaluk nunatta Canadallu akornanni Kennedy Kanalimiippoq, taannalu 1,2 kvadratkilometerit missaannik angissuseqarluni. Qeqertaq inoqanngilaq, naasoqanngilaq uumasoqaraniluunniit.
Tartupalullu uuliamik allanilluunniit pisuussuteqanngitsoq, ukiut ingerlanerini paasinarsivoq.
Naalakkersuisulli oqarnerat naapertorlugu qeqertaq nunatsinni Nunavummilu naggueqatigiinnut inunnut ileqqunut, ilisarnaatinut oqaluttuarisaanermullu pingaaruteqarpoq.
Qeqertap kimit pigineqarnera Danmarkip Canadallu ukiuni 50-ini saqitsaassutigaat. Canadap illersornissaqarfianeersut danskillu illersornissaqarfianeersut Tartupalummi arlaleriarlutik erfalasulertarsimapput.
Tartupaluulli avinneqarnissaa nunatta, Danmarkip Canadallu siorna aasakkut isumaqatigiissutigaat. Aamma uppernarsaat atsiorsimasoq nunatsinnukaanneqassasoq isumaqatigiissutigineqarpoq. Uppernarsaat maanna nunatsinniilerpoq.
Node link
Title
Nu er aftalen om Hans Ø underskrevet
Danskimmi nunanut allanut tunngasunut ministeriata, Lars Løkke Rasmussenip Nuummut sapaatip akunnerata siuliani tikeraarnermini taanna Vivian Motzfeldtimut tunniuppaa.
- Nuanneqaaq isumaqatigiissut qaammatini arlalinni utaqqereerlugu kiisami danskit nunanut allanut ministeriannit tigugatsigu. Isumaqatigiissut Canadamut Nunatsinnullu oqaluttuarisaanermi pingaaruteqaqisoq inissippoq, taamaattumillu Kalaallit Nunaaniitinnissaa pissusissamisoorpoq, Vivian Motzfeldt tusagassiuutinut nalunaarummi oqarpoq.
Alt
Title
Isumaqatigiissut qeqertamininnguamut uunga Tartupalummut tunngatillugu isumaqatigiissutaavoq. Assi: Ritzau Scanpix
Naalli pappiaraannaq pineqaraluartoq killeqarfik pillugu isumaqatigiissut Nunatta/Danmarkip Canadallu akornanni saqitsaassummik unitsitsissutaannaanngilaq.
Tamanna oqaluttuarisaanermik ilisimatusartup Aarhus Universitetimilu lektoriusimasup isumaqatigiissutip Ottawami siorna atsiornersiorneqarnerata kingorna KNR-imut oqaatigaa.
- Canadap Kunngeqarfiullu Danmarkip saassussiumatooq Rusland eqqarsaatigalugu suleqatigiinnissaat pingaaruteqarpoq, taanna oqarpoq.
