Tartupaluk piniartunut qaninnerpaami najugaqartunut sunniuteqarpallaanngitsoq
Danmarkip Canadallu ukiuni arlariinni Tartupalulerngusaannerat isumaqatigiissusiornikkut qaangerneqarpoq.
Tamannali Qaanaami Siorapalummilu piniartunut sunniuteqarnavianngitsoq piniartut oqaatigaat.
- Naamik uannut sunniuteqangaarnissaa ilimananngilaq. Aamma Tartupalulersaarutit ikittuararsuupput, Tartupalummut piniariartartunik takusaqarnikuunngitsunga uangalu nammineerlunga Tartupaluk takusimanngilara, piniartoq Qaanaami najugalik Mads Ole Kristiansen oqarpoq.
Avannarpasinnerulaartumi najugalik, piniartoqataa Siorapalummiu Maassannguaq Oshima isumaqataavoq.
- Immaqa imatut sunniuteqarnavianngilaq. Naamik piniariartoqarneq ajorpoq. Ingammik maannakkut manna sikussaariartorami maannakkut tikinneqarneq ajorpoq, taanna oqarpoq.
AAMMA ATUARUK Múte B. Egede: Tartupaluup avinnera Inuit ataatsimoorfigissavaat
Naalakkersuisut siulittaasuat, Múte Bourup Egede, Tartupaluup avinneqarnerani atsioqataasut ilagaat. Inugguillu piniartarnerat isumaqatigiissummi pingaarnerpaasoq, taassuma ippassaq oqaatigaa.
- Nunatsinnut iluaqutaasussaq pingaarneq tassaavoq, inuit inugguit, taavani piniariartarfinnik taavalu naggueqatigut inuit, Nunavummi najugaqartut, akunnerminni avitseqatigiillutik pisuussutinik atuinerminni killeqarfinnik annerusumik aporfeqartutut pinnatik piniarsinnaanerannut periarfissat ammarneqarmata, Múte Bourup Egede oqarpoq.
Tartupaluk
Kunngeqarfik Danmarkip Canadallu Tartupaluk ukiuni hunnorujungajanni saqitsaassutigaat.
Taamaammat Canadap illersornissaqarfianeersut danskillu illersornissaqarfianeersut Tartupalummi arlaleriarlutik erfalasulertarsimapput. Ilaatigut danskit illersornissaqarfianneersut canadamiunut ajunngisaarniarlutik snapsi puiaasaq Tartupalummut ilisimavaat.
Nunatsinni, Danmarkimi Canadamilu politikerit Tartupalummik piginnittussaaneq pillugu ukiorpassuarni saqitsaassutigaat, qeqertami tassani pisuussutit oqartussaaffigilernissaannut Tartupaluullu eqqaani sikuersimasuni sikuertartuniluunniit imarsiornermut ilaatigut tunngasuni.
AAMMA ATUARUK Kuupik V. Kleist: Inuit bør eje Tartupaluk, ikke staterne
Tartupalulli uuliamik allanilluunniit pisuussuteqanngitsoq, ukiut ingerlanerini paasinarsivoq.
Tartupaluulli eqqaani sikuersimasut imarsiorfissaqqissuusut kingorna paasineqarpoq.
Kalaallit Nunaata aamma Canadap akornanni isumaqatigiissut pingasoqiusaavoq: Tartupalummi killeqarfik, imarpikkut killeqarfik 200 sømilip iluani, Lincolnip imartaa aamma nunat toqqaviat ilanngullugit, Labradorip imartaata 200 sømilit qaangerlugit.