Kuupik V. Kleist: Tartupaluk naalagaaffiit susassarinngilaat uagununa naggueqatigiit perput
Tartupaluk qeqertaq Kalaallit Nunaata Canadallu akornaniippoq. Qeqertaq Tartupaluk killeqarfilerlugu maanna pisortatigoortumik avillugu titartarneqarpoq. Taamaaliortoqartariaqanngikkaluartoq, Kuupik V. Kleist KNR-imut oqarpoq.
- Isumaqarpunga naalagaaffiit susassarinngikkaat. Kisianni naggueqatigiit Inuit qeqertaatigigaat, aammalu naalagaaffinnut avinneqartariaqanngitsoq.
AAMMA ATUARUK Múte B. Egede: Tartupaluup avinnera Inuit ataatsimoorfigissavaat
- Isumaqarpunga periarfissatsialassuugaluartoq, oqarneratuut qeqertaq taama ittoq soqutaanngitsigisoq aallarniutigalugu naggueqatigiinnut Inunnut pigisassanngortikkaluaraanni naalagaaffinnuunngitsoq, Kuupik V. Kleist oqarpoq.
Naalakkersuisulli oqarnerat naapertorlugu qeqertaq nunatsinni Nunavummilu naggueqatigiinnut inunnut ileqqunut, ilisarnaatinut oqaluttuarisaanermullu pingaaruteqarpoq. Ilaatigullumi piniartut qimussikkut piniariartillutik akunniffigisarsimagaat.
Tartupaluk pillugu saqitsaanneq
Kunngeqarfik Danmarkip Canadallu Tartupaluk ukiuni hunnorujungajanni saqitsaassutigaat.
Taamaammat Canadap illersornissaqarfianeersut danskillu illersornissaqarfianeersut Tartupalummi arlaleriarlutik erfalasulertarsimapput. Ilaatigut danskit illersornissaqarfianneersut canadamiunut ajunngisaarniarlutik snapsi puiaasaq Tartupalummut ilisimavaat.
Nunatsinni, Danmarkimi Canadamilu politikerit Tartupalummik piginnittussaaneq pillugu ukiorpassuarni saqitsaassutigaat, qeqertami tassani pisuussutit oqartussaaffigilernissaannut Tartupaluullu eqqaani sikuersimasuni sikuertartuniluunniit imarsiornermut ilaatigut tunngasuni.
Tartupalulli uuliamik allanilluunniit pisuussuteqanngitsoq, ukiut ingerlanerini paasinarsivoq.
Tartupaluulli eqqaani sikuersimasut imarsiorfissaqqissuusut kingorna paasineqarpoq.
Taamaammallu naalagaaffimmut attuumassuteqanngitsoq, aatsitassaqarsinnaanerali naalagaaffiit pilerngukkaat Kuupik V. Kleist isumaqarpoq.
- Ersersiinnarpaat pissutsit qanoq ittuunerannik, ukua Inuit nunaanni nunasiaatillit, namminneq soqutigisatik aallukkaat, taanna oqarpoq nangillunilu:
- Soormi aatsitassarsiorfiginagu.
Tassungalu tunngatillugu naalagaaffik allaqqinnaamik oqariartuuteqarpoq.
AAMMA ATUARUK Tartupaluk pillugu isumaqatigiissut maanna atsiorneqartoq
Danskit nunanut allanut tunngasunut ministeriat, Jeppe Kofod, Kunngeqarfik Danmark sinnerlugu atsioqataavoq. Taassuma isumaqatigiissut iluarisimaarpaa.
- Naalagaaffiit killeqarfeqarnissaat pingaaruteqarpoq. Nunami pisuussuteqarpat, allanilluunniit peqarpat, taava naluneqassanngilaq sumi aalajangiisinnaanerluni naalagaaffiullu aappaa sumi aalajangiisinnaanersoq, Jeppe Kofod KNR-imut oqarpoq.
Kuupik V. Kleist isummani aalajangiusimavaa.
- Qularutiginngilara ajunngitsussaq anguniarlugu taamatut sulisoqartoq, kisianni periarfissaq immikkuullarissoq naggueqatigiinnut Inunnut pigisassanngortinneqarnissaanut taanna atorluarneqartariaqaraluartoq ukiumi matumani 2022-mi.
Tartupaluk nunatta Canadallu akornanni Kennedy Kanalimiippoq, taannalu 1,2 kvadratkilometerit missaannik angissuseqarluni. Qeqertaq inoqanngilaq, naasoqanngilaq uumasoqaraniluunniit.
Qeqertaaraq Tartupaluk, Qaanaamit 380 kilometerisut avannarpasitsigisumiippoq. Canadap nunattalu akornanni inissisimavoq. Taanna nunatsinnut Canadamullu 20 kilometerit missaanni isorartussusilimmiippoq.
