VIDEO Tarnip pissusaanik ilisimasalik: Nukappiaqqat angutillu paqumigisat atorunnaarneri iluaqutigisarpaat
Arnanut sanilliullutik angutit qaqutiguinnaq paqumigisat atorunnaarlugit sapiiserlutik ajornartorsiut taama saqqummiuttarpaat.
- Angutit aamma kinguaassiutitigut kanngutsaatsuliorfigineqartartut ilisimavarput, ikittuinnaalli maanga saaffiginnittarput. Amerlanerusariaqarpullu, imaassinnaavorli Henrik Thomsen tamatumani ikiorsiisinnaasoq.
- Angutit amerlanerit ikiorlugit, ammarlutik qanoq pineqarsimanertit oqaluttuaralugu, tarnip pissusaanik ilisimasalik Lars Husted KNR-imut oqarpoq.
Aamma atuaruk VIDEO Henrik Thomsenip kinguaassiutitigut atornerlugaanerup oqaluuserinissaa paquminarunnaarsippaa
Facebook aqqutigalugu Henrik Thomsenip tamanut oqaluttuarnerata kingorna niviarsiaqqat, nukappiaqqat inersimasullu amerlasuut assingusumik pineqarsimasut saaffiginnissimanerat uissuumminanngilaq.
- Ajoraluartumik uissuumminanngilaq. Ajoraluartumik quarsaarnanngilaq soorlu Henrik Thomsen oqaluttuartoq, kanngutsaatsuliornerit piffissap sivisuup ingerlanerani pisimapput. Inuusuttoq kinaluunniit eqqunngitsuliorfigineqartoq tusaraanni saaffiginninnissaq pingaaruteqarpoq.
- Paarisap meeqqanut inuusuttunullu oqarasuaataanut 134-mut sianerit, imaluunniit Attavimmut 146-mut sianerit, taakku aamma saaffigineqarsinnaapput, Lars Husted oqarpoq.
Aamma atuaruk Atuagaq ilinniut MIO-mit saqqummiunneqarpoq
Isertuussinermiit saqqummernissaq pingaarnerusoq, tarnip pissusaanik ilisimasallip erseqqissaatigaa.
- Unittoornissaq aamma qanittuararsuuvoq. Taamaattumik pisimasut pillugit ilaquttamut allamulluunniit tatigisamut ammarnissaq pingaaruteqartuusoq, tarnip pissusaanik ilisimasalik oqarpoq.
Paarisap Attaviullu oqarasuaataata 134-p unnukkut arfineq marluniit qulingiluat tungaannut ammasartup saniatigut, aamma meeqqat inuusuttullu oqaloqatigiittarfiata MIO'p sms-ikkut saaffiginnittarfia normoqarpoq 1899. Aammattaaq ulluinnarni Saaffik arfineq pingasuniit sisamat tungaannut oqarasuaatikkut 346011-ikkut saaffigineqarsinnaavoq.
