Kommuneqarfik Sermersuup borgmesteria, Avaaraq Olsen kommunillu Meeqqanut Ilaqutariinnullu Ingerlatsiviata pisortaa, Frederik Lundblad, takornarialerinikuusumik Nuuk Outdoorimik Isunngamik ateqaleqqammertumik meeqqanik suli inissiigasuartarneq pillugu ulluni arlaqalersuni oqaloqatiginiartaraluarpagut.

Avaaraq Olsen sianerfigalugu allaffigalugulu attaviginiartaraluarparput, taannali akisanngilaq.

Meeqqanut Nuuk Outdoorimi inissitanut pissutsit borgmesterimit aamma meeqqanut ilaqutariinnullu ingerlatsiviup pisortarisimasaanit isornartorsiorneqarnikuugaluartut, kommuni suliffeqarfimmut tassunga meeqqanik sooq suli inissiigasuartarnersoq paasiniarlugu, Avaaraq Olsen Frederik Lundbladilu oqaloqatiseralugit attavigisarpagut.

Frederik Lundbladilli allakkatigut naggataatigut akivaatigut. Taanna kommunip meeqqanut ilaqutariinnullu ingerlatsiviani decembarimili pisortaavoq, taassumalu akissutini allaganngorlugit uagutsinnut nassiuppai. Apersuutivunngooq mianernarmata taamaaliorpoq.

Tassa paasisaqarnerunissamik periarfissinneqanngilagut, taamaammat apeqqutinut nassiussatsinnut akissutaat aaqqissornagit saqqummiuppavut.

Pissutsit ajorpallaanngitsut

Sooruna Nuuk Outdoor meeqqanik suli inissiigasuartarfigaasiuk?

- Nunatsinni tamarmi meeqqanut ulloq unnuarlu angerlarsimaffiit inissaalatsinerat pissutigalugu, Frederik Lundblad allappoq.

Nuuk Outdoorimi meeqqanut pissutsit borgmesterimit pisortamillu isornartorsiorneqarnikuupput – tamatuma kingornali arlaatigut allanngortoqarpa?

- Tassunga arlaleriarluni nakkutilliisoqariartortoqarnerani tassani pissutsit ajorpallaanngitsutut nalilerneqartarput.

Sooruna illoqarfiup ilaani inuit angerlarsimaffeqarfianni ulloq unnuarlu angerlarsimaffeqartoq? 

- Tamannarpiaq ajoraluartumik akisinnaanngilara. 

Illu taanna ulloq unnuarlu angerlarsimaffittut akuerisaanngivittoq soormitaavaana meeqqanik inissiigasuarfiusartoq?

- Tamannarpiaq ajoraluartumik akisinnaanngilara.

Taamatullu atuutilertinnagu tamaani illullit sooruna tusarniarneqaqqaarsimanngitsut? 

- Tamannarpiaq ajoraluartumik akisinnaanngilara.

Tamaanilu illulinnit kommunimut naammagittaalliutigineqartareeraluarluni sooruna “ulloq unnuarlu angerlarsimaffittut” suli atuuttoq? 

- Tamannarpiaq ajoraluartumik akisinnaanngilara.

Illu taanna "ulloq unnuarlu angerlarsimaffittut" akuerisaanngitsoq paasigassiulli ukiup affaa qaangiussimalerpoq – sooruna tamanna suli iliuuseqarfiginngikkissi? 

- Tamannarpiaq ajoraluartumik akisinnaanngilara.

Suliap nammineerlusi naammassinnissaaniit akikinnerummat taamaaliorpisi? 

- Naagga.

Suliaq taanna nammineerlusi pitsaanerusumik naammassisinnaagaluarpisiuk? 

- Tamanna akisinnaanngilarput, naammassinniisinnaasumik inissaateqaanngilagut.

Apeqqutissaqarneruleriaannartugut

Tassa kommuni ulloq unnuarlu angerlarsimaffittut akuerisaanngitsunut meeqqanik sooq inissiigasuartarnersoq paasingaanngilarput. Apeqqutittami ilarpassui akinngimmatikkit apeqqutissaqarneruleriaannarpugut.

Nuuk Outdoor - Isunngamik maanna atilik - meeqqanik sooq suli inissiigasuartarfiusarnersoq, paaserusulluinnakkatsinnut soorunami ilaavoq.

Meeqqanik ulloq unnuarlu angerlarsimaffittut akuerisaanngitsunut inissiisarneq qanoq kinguneqarsinnaanersoq, allaaserisani tulleriiaartuni ulluni tulliuttuni sammissavarput.