Tivolimi ukiuni 50-ini ataatsimoorneq: - Tamaani naapittarpugut
Kalaallit Nunaat Tivolimi aggustip aallaqqaataani aappaannilu ukiuni 50-inngortorsiorneranut atatillugu nuannattoqarpoq.
Pisartoq 1976-imili ileqqorineqalerpoq. Taamani atuaqatigiit Nuummeersut Danmarkimi ilinniariartortussat Tivolimi aggustip aallaqqaataani naapissallutik isumaqatigiipput.
Ileqqoq ullumikkut ilisimasarput peqatigiiffik Kalaallit Nunaat Tivoli 2001-imi aallartinneqarpoq, Kalaallit Nunaat Tivolimi aallarniisut aallartimmassuk, nuannaarniartarfillu kalaallit piorsarsimassusaannik ulloq taanna immersorneqarluni.
Inuit tusindilikkaat Københavnimi ukioq manna aamma Tivolimukaapput, tassani kalaallit piorsarsimassuserput tuniniaavitsigut, oqaloqatigiinnikkut nipilersornikkullu minnerunngitsumillu ataatsimoornikkut misigineqarsinnaavoq. KNR-ip inuit tallimat ileqqup qanoq pingaaruteqartigineranik apersorpai.
Naja Kriegbaum: - Nammineq eqqumiitsuliornissannut isumassarsisinneqarpunga
Kalaallit Nunaat Tivolimi ilinnut qanoq pingaaruteqarpa?
- Anaanaga Qullisaninngaanneerpoq Kalaallit Nunaat Tivolimilu kalaallit piorsarsimassusaata Danmarkimiikkaluarluni misiginissaanut periarfissatsialaavoq. Kalaallit Nunaanninngaanneersut ilaquttat, ikinngutit nalunngisallu maani naapissinnaavagut. Nuanneqaaq, Naja Kriegbaum oqarpoq.
Kalaallit piorsarsimassusaanni pitsaanerpaaq amerlanerit suna misigisariaqaraluarpaat?
- Nammineq eqqumiitsuliortuuvunga taamaattumik eqqumiitsuliortut eqqumiitsuliaminnik tuniniaasorpassuit kalaallit piorsarsimassusaata utertinneqarnissaanut ersersinneqarnissaanullu timikkut tarnikkullu tunniussaat. Tamanna isumassarsiorluarnartorujussuuvoq takunissaalu uannut pingaaruteqaqaluni.
Ullumi qanoq pissarsiaqarnissat neriuutigaajuk?
- Isumassarsineq peqqissuserlu. Danmarkimi peroriartorpunga taamaattumik inuusuttuaraallunga kalaaliussuseq amigaatigisimavara. Maaniilluni malugalugu nuannertuaannarpoq.
Kalaallit Nunaat Tivolimit suna immikkut eqqaamasaqarfigaajuk?
- Meeraaninnit inuusuttuuninniillu eqqaamasarpassuaqarpunga taakkunani Naja Abelsenip eqqumiitsuliai isiginnaartarpakka eqqarsartarpungalu: Uanga aamma taamaaliorusuppunga. Nammineq eqqumiitsuliornissannut isumassarsisippaanga taamaalillungalu kalaaliussusera ilisimanerulerpara.
Najaaraq Olivia Nielsen: - Uagut nammineq ataatsimooriaaseqarpugut
Kalaallit Nunaat Tivolimi ilinnut qanoq pingaaruteqarpa?
- Pingaaruteqartorujussuuvoq, tamaanimi ilaquttakka, ikinngutikka nalunngisakkalu Kalaallit Nunaanniit naapissinnaavakka. Soorunami aamma nipilersortartut pikkorissut tusarlugit, Najaaraq Olivia Nielsen oqaluttuarpoq.
Kalaallit piorsarsimassusaanni pitsaanerpaaq amerlanerit suna misigisariaqaraluarpaat?
- Uatsinnut kalaallinut piorsarsimassuseq pingaaruteqartorujussuuvoq pissutigalugu ataatsimoorsinnaagatta nuannaarlutalu. Uagut nammineq ataatsimooriaaseqarpugut.
Ullumi qanoq pissarsiaqarnissat neriuutigaajuk?
- Kalaallit nipilersugaannik nuannersunik tusarnaarneq.
Pele Nathansen: - Inuit qungujulasorpassuit
Kalaallit Nunaat Tivolimi ilinnut qanoq pingaaruteqarpa?
- Misigisaq tupinnaannarpoq. Uannut pingaaruteqartorujussuuvoq, pissutigalugu inuit qungujulasorpassuit takuneqarsinnaapput aamma ikinngutit nalunngisallu naapinneqarsinnaammata. Nuannerpoq. Kalaaleqatinik takugaanni ingerlaannaq ilassiorneq, Pele Nathansen oqarpoq.
Kalaallit piorsarsimassusaanni pitsaanerpaaq amerlanerit suna misigisariaqaraluarpaat?
- Piorsarsimassuserput nuannaartitserusunnermik illartitserusunnermillu ulikkaarpoq.
Kalaallit Nunaat Tivolimit suna immikkut eqqaamasaqarfigaajuk?
-Eqqaamasarpassuupput. Eqqaamasaqarfiginerpaavakka ukiut ingerlanerini tusarnaartitsinerit – amerlaqaat.
Irene Siwi Holm Nielsen ataatsimooqateqarusuttoq
Kalaallit Nunaat Tivolimi ilinnut qanoq pingaaruteqarpa?
-Ernutara ilagalugu qatanngutikka marluk naapinniarlugit maannarpunga. Inuit nalunngisat naapillugit nuannerpoq, Irene Siwi Holm Nielsen oqarpoq.
Kalaallisut piorsarsimassuseq maani misigalugu qanoq ippa?
- Naapitassarpassuaqarluni nuanneqaaq, tamarmillu nuannaarput.
Kalaallit piorsarsimassusaanni pitsaanerpaaq amerlanerit suna misigisariaqaraluarpaat?
- Kalaaleqatigiit akornanni ataatsimoorsinnaassuseq peqatigiinnerlu.
Ullumi qanoq pissarsiaqarnissat neriuutigaajuk?
- Misigisassarpassuaqarnissaq.
Gaaba Hvalsum: - Ukiut tamaasa tamaaniittarpugut
Kalaallit Nunaat Tivolimi ilinnut qanoq pingaaruteqarpa?
- Ukiut tamaasa tamaaniittarpugut. Tasiilamiilli Danmarkimut 2001-imi nuukkatta taamaaliortarpugut. Kalaaleqaterpassuagut takullugit nuannerpoq, aamma tuniniakkat kalaalerpaluttunillu pisisinnaaneq, Gaaba Hvalsum oqaluttuarpoq.
Kalaallit piorsarsimassusaanni pitsaanerpaaq amerlanerit suna misigisariaqaraluarpaat?
- Immaqa tuniniakkat, mersukkat assassukkat kalaalerpaluttullu pisiarineqarsinnaasut.
Ullumi qanoq pissarsiaqarnissat neriuutigaajuk?
- Sivisuumik takunikuunngisama naapinnissaat. Nuannissagaluarpoq.
