Talerperliit suleqatigiinnissaat ilimanartoq
- Maluginiarsimavara saamerliunerusumut inisseqqanerat, immaqa saamerliunerit talerpiatungaanut, Demokraatini siulittaasoq Anda Uldum oqarpoq.
Illuatungaanilu Atassutip siulittaasuata Demokraatit nikeriarsimanerpai, isumaqarami sumi inissisimanertik paatsiveerusimaarfigigaat.
- Tassa oqartaraluarpusi social liberaliullusi, liberaliorusoqalusilu. Ajunngilaq, Knud Kristiansen oqarpoq.
Sulisartoqarnermi atugassaritat pitsaanerusut
Naalakkersuisuutitaqarnerit tulleriinni marlunni Demokraatit Atassutikkullu Naalakkersuisuni illuatungeriittarsimapput. Amerlasuutigulli isumaqatigiissuteqarput.
Sulinermut ilanngaat Demokraatit eqqukkusuppaat. Atassutilli tamanna eqqartornissaanut ammaffigisorujussuuaat.
Ingerlatseqatigiiffiit akileraautaata apparnissaa isumaqatigiissutigaat
Ingerlatseqatigiiffiillu akileraarutigisartagaat partiit marluullutik apparniarpaat. Demokraatit maanna 30 procentiusoq 20 procentimut apparusuppaat, iluaqutaasussatulli isigalugu.
- Akileraarutitigut iluarsartuusserusuppugut. Pilerinarsarusupparput suliffeqarfiuteqarsinnaaneq, Anda Uldum oqarpoq nangillunilu:
- Aningaasartuutaanavianngilaq, aningaasat toqqaannaq karsimut utissapput. Tamanna qularinngilarput, Anda Uldum oqarpoq.
Atassut aamma taamapajaaq isumaqarpoq.
- Atassumminngaanniit oqarpugut, suli apparteqqikkusupparlugu aningaasaliinertullu isigalugu. Taamaammat 20-25 procentillu akornaniippugut, Knud Kristiansen oqarpoq.
Assortuussutillit
Partiit marluk taakku isumaqatigiissinnaagaluaqalutik suli assoortuussuteqarput, sulilu naapivinnissamut aqqut ungasilluni.
- Isumaqaannarpunga Atassut saamerliunerusumut inississimasoq, ilaasortaammi arlallit siumumi ajornanngitsumik nuuttarnerisa tamanna takutikkaat, Anda Uldum oqarpoq.
Aappaanilu Knud Kristiansen piumasaqarput, talerperlernullu isumaqatigiissinnaaneq matoqqaffigiunnaarlugu.
- Demokraatit ersarinnerusunik isumaginninnermut nunaqarfinnullu politikkeqalerpata, aalisarnerup tungaatigut siammasinnerusumik politikkeqalerpata aammalu ilinniarnermut politikkeqalerpata, oqaloqatigiissinnaassaagut, Knud Kristiansen oqarpoq.
Atassutikkut royalty eqqarsaatigeqqinniarpaat
Qallunaatut oqallitsitsinermi Atassutikkut maluginiarnartumik nassueruteqarpoq. Knud Kristiansenip ineriartornermut iluaqutaasinnaassappat kisermaassilluni akileraarutip royaltyp atorunnaarsinnissaa ammaffigaa.
- Aaqqissuussineq suna atussaneripput Demokraatit peqtigalugit eqqartuerusuppugut.
Kisermaasilluni akileraaritit royalties eqqartorneqarnersut aperineqarami knud Kristiansen angerpoq.
Oqallinneq tamakkerlugu uani takusinnaavat.