Takornariat sumiissusersiuuteqarsinnaalissasut
Nunatsinnut takornariartut amerliartorput taakkunanngalu pinngortitatsinnut angalajartortut amerliartorlutik.
Takornarianik angallassisut takornariat isumannaatsuunissaat qulakkeertarpaat, takornarialli namminneerlutik pinngortitami angalaaleraangamik sillimanissaat qulakkeerneqarsinnaanngilaq.
Taamaammat Qeqqata Kommuniata atortorissaarut atorlugu Arctic Circle Trailikkut aqqut isumannaatsunngortinniarpaa.
- Tassa tamakkua nakkutigiuminaatsittarpagut. Qaqugumi tikissanersut, asimi qanoq sivisutigisumi angalaassanersut qaqugulu utissanersut takusinnaaneq ajorparput, Arctic Business Councilimi takornariagassanik pilersaarusiortartoq Olafur Rafnar oqarpoq.
AAMMA ATUARUK Søskende har ikke opgivet håbet
Sullinniakkat tassaapput takornariat nalunaarsorneqarneq ajortut, soorlu Kangerlussuarmiit Sisimiunut Arctic Circle Trail atuarlugu ingerlaartut.
Takornariarlu ilisimaneqarani angalaarmat siorna alianartumik kinguneqarpoq, tassami taanna kinameersoq aqqummi tassani periarfeerunneqarpoq.
Atortorissaarulli Personal Location Beaconimik taaguutilik, GPS-italik, takornarianut neqeroorutigineqartalertuuppat isumannaallisaataassagaluartoq, Arctic Business Council isumaqarpoq.
- Ajutoorsimaguit nammineerlutillu utersinnaanak taava toortagaq toorukku sumiissusersineqarsinnaalissaatit. Taava Sisimiuni Kangerlussuarmilu upalungaarsimasut sukkasuumik nassaarisinnaalissavaatsit, Olafur Rafnar oqarpoq.
Angutip periarfeerunneqartup ilaqutai atortorissaarutinik taama ittunik pisissutissanik 100.000 koruuninik Qeqqata Kommunianut tunissuteqarput.
Atortorissaarutilli ukioq manna atorneqarsinnaalernissaa Arctic Business Councelip qularaa.
- Maanna atorsinnaalertuuppat ajunngissagaluaqaaq. Naatsorsuutigaarput ukioq manna misilerassagivut, taamaammat ukioq manna misileraaniarnerput isertuussinnaanngilara. Kisianni tassa atortorissaarut sukkasuumik ajornanngitsumillu atuutilersinniassavarput, Arctic Business Councilimi takornariagassanik pilersaarusiortartoq Olafur Rafnar oqarpoq.
