Takornariartaat suli ikkarleqqavoq
Takornariartaat Tunup avannaarsuani kangerluit ilaanni Alpefjord-imi ippassaq ataasinngornermi ualikkut ikkarlittoq, suli kaannganngitsoq, Issittumi Sakkutooqarfik/Arktisk Kommando KNR-imut ualiartoq ilisimatitsivoq.
Takornariartaat 206-inik issimasoqartoq ullumi uleriarmat kaanngarniarsimagaluarpoq iluatsitsinanili, Brian Jensen, Issittumi Sakkutooqarfimmi iliuuseqarnernut immikkoortortami pisortaq oqarpoq
Umiarsuaq orsussamik akuutissanilluunniit arrortinneqarsinnaanngitsunik kangerlummut aniatitaqannginnersoq qulakkeerniarlugu, Issittumi Sakkutooqarfiup timmisartuaraa challengeri ullumi qulaavaajartortinneqarpoq.
- Qulaavaanerani paasineqarpoq, umiarsuaq suli ikkarliffittut nalunaarutimmi suli ikkarleqqasoq. Umiarsuarmiillu mingutsitsisoqanngitsoq paasivaat, Brian Jensen oqarpoq.
- Maannamut nalunaarutisiaraarput ilaasut inuttaasullu tamarmik ajunngitsut, umiarsuarsuaq ajoqusersimanngimmat.
Avaataanit ikiortissarsiortoqariaannaasoq
Umiarsuarsuaq ulinnerpaaffimmi tullermi kaannganngippat allanit ikiorserneqarnissaq tullinnguuttariqarsinnaavoq, taamali pisoqassappat akisussaaffik umiarsuarsuup umiarsuuaatillillu aalajangigassaraat. Imaassinnaavormi umiarsuarsuup ungasinngisaani ikiuussinnaasunik aamma angallateqartoq, Brian Jensen oqaluttuarpoq.
Issittumi Sakkutooqarfiullisakkutuut umiarsuaat Knud Rasmussen Tunup Avannaarsuanut aallartereerpaat, naatsorsuutigineqarporlu tallimanngornerup ullaavani apuukkumaartoq, ilisimatitsivoq.
Nakkutigisassaq pingaarnerpaaq tassaalerpoq ikkarlittup ajornerusumik inissisimalinnginnissaa, soorlu avatangiisit, ilaasut sulisuilu eqqarsaatigalugit.