Søren Paamiuni takornarianik tikilluaqqusissaaq: Takornariartaassuit tikinnissaannut qilanaalereerpoq

Paamiunut takornariartaassuarnut ilaallutik aasaanerani siorna tikittut 13.000-it sinneqarput.

Takornariat illoqarfimmik anginngitsumik qaqqanik ungaluneqarsimasutullusooq ittumik, aappalaartumik qalipaatilimmik kusanarluinnartumik oqaluffimmik, sannavimmik aamma kitaani illoqarfimmi inuunermik nalinginnaasumik oqaluttuunneqarsinnaasarput.

Tamakku tamaasa nunaqavissut tikilluaqqusinissamut piareersimasut isumagisinnaasarpaat.

Taakku ilagaat 47-nik ukiulik Søren Petersen.

- Aatsaat siullermeerlinga guide-ugama misigisaq taanna nuannersorujussuuvoq, oqarpoq.

Søren Petersen nakkarluni ukiut 20-t matuma siornagut ajutoornermigut pisussinnaajunnaarami innaallagiatortunik qamutinik assakaasulinnik atuisunngorpoq.

Innarluutinili takornariartaassuit tikikkaangata uniinnassutigisanngilaa. Tupilak Travelimi sullillugu takornariartitsisartutut siorna aasakkut aallartippoq.

- Turistit tikikkaangata illoqarfik takitittarparput angalaarluta. Illup iluani (Nuilaami) soqarnersoq, sussanersut oqaluuttarpakka, taama oqariarluni ulluunerani sammisassaqartitsiviup Nuilaap initaanut tikkuartuivoq.

Søren Petersenip sammisassaqartitsivimmik atuisut iverusiaannik, takornarianut tuniniarneqarnissaminnut piareeqqasut ilaannik nittarterivoq. Nammineq sanalugaasa ilagaat iverutit qilaatitut ilusilerlugit tuttup nassuanik sanaat. Assi © : Thor Bill / KNR

Sammisassaqartitsivik kommunip innarluutilinnut sullivissatut pilersitaraa. Sapaatit akunnerini ullut ilaat pinnguarnermut (ludo, dam allallu) kaffisoqatigiinnernut, kaagiliornernut illoqarfimmilu eqqumiitsulianik kusanartuliornernut atorneqartarput. Tamakkuuppullu atuisartut takornarianut takutissinnaasaat tammajuitsussarsiatullu taakkununnga tunisinnaasaat. Tassaasinnaapput iverutit sapangaaqqanik sanaat, ukkusissamik qiperukkat aamma nasat nuersakkat.

Sammisassaqartitsivik Søren Petersenimillu naapitsineq takornarianit assut nuannarineqartartut, nammineq oqaluttuaraa.

- Assut pikkorinaartarpaannga, immaqa kørestolini issiariarama, immaqa taanna pineruaat.

Taamaammat takornariartaassuit Paamiunut aasaanerani tikeralernissaat qilanaarilereerpaa.

- Ilikkakkat, paasisaqarnartaqaaq, taavalu nunamiit allamiit assigiinngitsut naapissinnaallugit assut nuannertarami, qungujulluni oqarpoq.

Tamanut misigisaavoq nuannersoq

Sammisassaqartitsiviup Nuilaap Tupilak Travelillu suleqatigiinnerat siorna aallartippoq.

Tamannalu Nuilaamik atuisut assorujussuaq tapersersoraat, sammisassaqartitsivimmi pisortaq, Andrine Jensen, oqaluttuarpoq.

- Umiarsuit turistit tikerartissat paasigatsigit misilikkusullugu sullitallu støttellu sulisullu piareersarluta aallartissimavugut.

Suleqatigiinnissamik aalajangerneq, Andrine Jensenip kingorna assut nuannaarutigisaqaa.

- Attaveqaqatigiinneq aallaavigalugu allanut sullissisinnaaneq misilinniassammassik turistilerineq misilissimavaat, taannalu iluatsilluarnikuuvoq - turistit sullillugit.

Andrine Jensenip, sammisassaqartitsivimmi Nuilaami pisortaasup, oqarnera naapertorlugu, atuisut arlallit, takornariarpassuarnik oqaloqateqarluarsinnaaneruniarlutik, tuluit oqaasiinik pikkorissarsimapput. Assi © : Thor Bill / KNR

Takornariartitsisutut sulineq aamma atuisunik ammanerulersitsillunilu tikilluaqquserpalaarnerulersitsisoq, aamma isumaqarpoq.

Nutaanik illoqarfeqateqalernermi illoqarfiulluunniit avataaningaanniit tikittoqarpat ammanerullutik attaviginiarsinnaalissagaat siunertarineqarsimavoq. Innuttaqatiminnullu arlalinnut tamanna iluatsereersoq, Andrine Jensen oqarpoq.

Takornarianut attaveqarneq aamma tassarpiaavoq, Søren Petersenip pingaartitaa, nammineq oqaluttuarpoq.

- Turistilerineq nuanneqigami misilittakkallu aamma nuannersit.

Suleqatigiinneq Tupilak Travelimit aamma nuannaarutaavoq. Tamanna angalanermik takornarialerinermillu suliaqartup Pipaluk Ostermannip KNR-imut allakkamigut uppernarsarpaa.

- Suleqatigiilluarnikooqaagut takornarianullu misigisaasimavoq annertooq. Nuilaaq kaffimik, tiimik kaaginillu sassaallertarpoq aamma assassukkanik sanalukkanillu takornarianut tuniniaasarluni. Assorsuaq suleqatigiinnerput nuannaarutigaarput.

Visit Greenlandip tikittussannik allattorsimjaffia malillugu takornariartaassuaq Paamiunut tikittussaq siulleq 1.115-it angullugit issimasulik juunip 14-iani tikissaaq.

Paamiunut takornariartaassuit aasaanerani tikittussat 16-iupput, taakkulu takornarianik katillugit 15.343-t angullugit ilaasoqassapput.