SAR-imik annaassiniarneq: Takornariaq qulimiguulimmik aaneqartoq

Arnaq 55-inik ukiulik Litauenimeersoq sisamanngormat Arctic Circle Trailimi, Sisimiut Kangerlussuallu akornanni, pisulluni angalaartilluni isikkaminik pilluttoorpoq.

Kalaallit Nunaanni Politiit sisamanngormat nalunaaqutaq 13.35 taama kalerrinneqarput.

Kalerrisaarut pisullutik angalaartut ajornartorsiornerminni kalerriissutigisartagaat assammik paarisartagaq aallartinneqarsimavoq.

- Qulimiguulik taakunnartipparput, tassanilu pisullutik angalaqatigiit inuit 11-t nanivagut, taakkunanngalu ataaseq pilluttoorsimavoq pisussinnaajunnaarlunilu, pigaartut pisortaat Bent Johnsen KNR-imut taama oqarpoq.

Qaammatip ataatsip iluani pingajussaat

Politiit SAR-imik ujaasisimanerat annaassiniaasimanerallu kingusinnerpaaq aggustip pingajuanni pivoq.

Tassani pujornera pissutigalugu angutit inuusuttut marluk Paamiut avaannaatungaani pisullutik angalaarnerminni imminnut tammaasimapput.

Juulip 26-iani nukappiaqqat inuusuttuaqqat pingasut ujaarineqarput, taakkua Ilulissat eqqaani qaqqami innaaqqissumi Akinnaq Pukkinnermi majuarsinnaajunnaarlutillu atersinnaajunnaarsimapput.

Juulillu 12-ianni pisullutik angalaqatigiinneersoq inuk ataaseq Sisimiut avannaata kangiani iluaalliulersimavoq.

Arnap Litauenimeersup maanna qanoq innera politiit paasissutissaatiginngilaat.