Taasinerit siulliit kisinneqareertut: Biden taaseqqaartunit tamanit tallimaasunit qinerneqartoq
USA-mi præsidentimut ullumi marlunngornermi qinersisoqarnerani qinersiviit ilaanni taasinerit kisinneqareersimapput, demokratillu sinnerlugit qinigassanngortittoq Joe Biden tassani qinerneqartutuaasimalluni.
Naalagaaffimmi New Hampshiremi illoqarfeeqqami Dixville Notchimi qinersisinnaasut katillutik aqqaneq-marluupput, qinersivillu New Hampshiremi unnuap-qeqqartoq ammarneqariikatappoq, qinersisartullu pisarneq naapertorlugu qinersiartorlutik.
Illoqarfeeraq Dixville Notch USA-p Canadamut killeqarfiata nalaaniippoq, qinersisartullu siulliit tallimat qinersivik ammarsimatsiaannartoq qinersiartorput, tamarmillu Joe Biden qinerpaat.
Præsident Donald Trump Dixville Notchimi taamaalilluni suli qinerneqanngilaq.
AAMMA ATUARUK USA-mi ullumi qinersisoqarpoq – apeqqutit pingaarnerit aajuku
Illoqarfeeraq taanna USA-p avannamut kangisissuaniippoq, præsidentimullu 1960-imili qinersisarnerni qinersivinni siullersaalluni ammartarpoq, siullersaallunilu aamma matusarluni.
Dixville Notchimili inernerit qinersinerup ataatsimut isigalugu inerneriumaagassaanut pinerit tamaasa tikkuussisuuneq ajorpoq.
Dixville Notchimi qinersisinnaasut akornanni amerlanerussuteqartut Hillary Clinton 2016-imi qinerpaat, taannali ilisimaneqartutut qinersinermi ajorsarpoq.
Præsidentimut 2012-imi qinersisoqarmat Barack Obama republikanerillu qinigassanngortitaat Mitt Romney naligiipput.
USA-p kangisissuani naalagaaffinni qinersiviit amerlanerit nunatta nalunaaqutaa naapertorlugu maanna arfineq-pingasunut pisortatigoortumik ammassapput.