USA-mi ullumi qinersisoqarpoq – apeqqutit pingaarnerit aajuku

Amerikamiut præsidentitaassaminnik ullumikkut unnuarulu qinersissapput. Donald Trump præsidentinngoqqissava Joe Bideniluunniit qinigaassava? USA-mi qinersinerup ingerlarnga knr.gl-imi KNR1-imilu malinnaavigiuk.
Trumpip qinersisartunik ataatsimiisitsinera kingulleq Michiganimi pivoq. Assi © : KNR
Allattoq Christine Hyldal
novembarip 03-at 2020 11:04
Nutserisoq Hanne Petersen

Amerikamiut ullumi qinersipput. Republikanerineersoq Donald Trump præsidentiuinnassanersoq, demokratineersorluunniit Joe Biden præsidentip illorsuanut Det Hvide Husimut nuussanersoq aalajangissavaat. 

USA-mi qinersinerup ingerlarnga KNR1-imi unnugu nalunaaqutaq qulingiluaniit malinnaavigisinnaavat, aamma unnugu unnuarulu pisut kingulliit pillugit allaaserisat nittartakkatsinni uani knr.gl-imi saqqummiuttassavagut.

USA-p avannamut kangisissuani naalagaaffinni New Hampshiremi Vermontimilu qinersiviit siulliit nunatta nalunaaqutaa malillugu unnuaq nalunaaqutaq marlunut ammarput. 

Qinersiviit kingulliit Alaskami nunatta nalunaaqutaa malillugu unnuaru nalunaaqutaq marlunut matussapput.

USA-mi inuit qinersisinnaatitaasut 239 millionit missiliorpaat. University of Floridami professorip, Michael McDonaldip, amerikamiut 150 millionit missaat qinersiartussangatikkai, dr.dk allappoq.

Inernerit qaqugu saqqummiunneqassappat?

Apeqqut tamanna imaaliallaannaq akineqarsinnaanngilaq. Inernerimmi sivisuumik utaqqineqarataannaammata.

Tv-qarfiilli nutaarsiassaqartitsivillu AP qinersinerup unnukkuani ajugaasumik taasisut kisinneqarsimasut aallaavigalugit nalunaaruteqarneq ileqqoraat. 

Qinersinerulli ulluani allakkatigut qinersinerit naalagaaffinnut arlalinnut qinersinermiit ulluni tulliuttuni apuuttoqarsinnaasarpoq. Allakkatigullu qinersinerit inaarutaasumik inernerusunut ilanngunneqartussaapput. 

Assi © : KNR

Assi: Scanpix

 

Naalagaaffiit tamarmik immikkut maleruagassaqarput. Allakkatigullu qinersinerit naalagaaffiit ilaannut novembarip ulluisa 17-ianni aatsaat apuuttartut, nutaarsiassaqartitsivik Ritzau allappoq.

Trump tamatumunnga akerliuvoq. Taannami isumaqarpoq, qinersinerit qinersinerup ulluata kingorna apuuttut tamarmik ilanngunneqartariaqanngitsut. 

Naalagaaffinnili aalajangersimasumik taasisussat decembarip ulluisa 14-ianni pisortatigoortumik taaseqatigiissapput. 

Naalagaaffiit qinersinermi naligiiffiukkajuttut sooruna taama pingaaruteqartigisut? 

Naalagaaffiit ilarpaaluini qinersinerit qanoq inerneqassanersut nalunarneq ajukkajupput. Naalagaaffiimmi ilaat republikanereqarfissuupput, ilaallu demokrateqarfissuulluutik. 

Naalagaaffiillu ilaat qinersinermi naligiiffiusarput. Naalagaaffiillu taakkua qinersinermi naligiiffiukkajuttartutut taaneqartartut tassaapput: Arizona, Florida, Georgia, Michigan, Minnesota, Nevada, New Hampshire, North Carolina, Pennsylvania Wisconsinilu. 

Floridami qinersineq tamatigorluinnangajak naligiiffiusarpoq. Republikanerilli Floridami ukiuni kingullerni amerlanerussuteqalaartarlutik. Floridalu præsidentinngortussap kinaanissaanik aalajangiisooratarsinnaasoq ukioq manna aamma ilimagineqarpoq. 

Donald Trump New Yorkimit Floridamut 2019-imi ukiakkut nuuppoq, tassanilu maanna najugaqartutut ukioq manna isigineqarluni.

Assi © : Scanpix

Assi: Scanpix

 

Texasili aamma pingaaruteqarpoq.

Texas sivisuumik republikanereqarfissuullunilu demokratit ukiut qulikkuutaat pingasut missaat kingulliit ajorsarfigisarmassuk inorsarfigisarpaat. Demokratilli republikanerit assigalugit Texasimi naalagaaffinni allanisulli 2020-mi ajugaanissartik neriuutigisorujussooqqilerpaat. 

Joe Biden præsidentinngussappat taassumunnga tullersortissatut qineqqusaartoq, Kamala Harris, naalagaaffimmut Texasimut tallimanngormat tikeraarpoq. Demokratit Texasimi ajugaaratarsinnaanertik nutaarsiassaqartitsivik AP naapertorlugu nalunanngitsumik ilimagigitsik, dr.dk allappoq. 

Texasimi qinersisinnaatitaasuni 9 millionit qinersereersimapput. Taakkua Texasimi 2016-imi qinersinermi qinersisunit amerlanerupput.

Taasisussat pingaaruteqartut 

Naalagaaffinni aalajangersimasumik taasissussat katillutik 538-upput. Taakkua USA-p naalagaaffiini 50-ini agguataaqqapput.

Naalagaaffiit tamarmik immikkut aalajangersimasumik amerlassusilinnik taasissussaqartarput, taamaammat naalagaaffiit amerlanerpaanik taasisussallit pingaaruteqartupilussuusinnaapput. Præsidentip illorsuani allaffeqalersinnaajumalluni taasisussanit amerlanerussuteqartunit tassa 270-init taaneqarsimasariaqarpoq.

Naalagaaffiit præsidentinngorniuttunik taasisussaminnik namminneq toqqaasarput.

Taamaammat præsidentinngorniuttuni taaguunneqarnerpaaq toqqaannaartumik præsidentinngortitaasanngilaq. Præsidentinngorniussimasunimi tallimat taaguunneqarnerpaagaluarlutik præsidentinngornikuunngillat. Hillary Clinton Donald Trumpimut 2016-imi ajorsarmat kingullermik taama pisoqarpoq.

Hillary Clintonimi Donald Trumpimut sanilliulluni 2,8 millioninit amerlanerusunit taamanikkut taaguunneqarnerugaluarpoq.