Taarsiiffigitinnissamut ilungersuuteqarneq

Timmisartumut ilaatilluni apuussissaviup tungaanut kinguaattoornermi EU-p malittarisassai naapertorlugit taarsiivigineqarsinnaaneq atuuttoq, EU-mi eqqartuussiviit aalajangerpaat
Assi © : Camilla Dam/KNR
juulip 10-at 2018 07:50

Air Greenland naapertorlugu eqqartuussivimmi aalajangerneqartoq imminnut allannguuteqartitsinngilaq. Malittarisassalli naapertorlugit taarsiiffigitinniarneq ajornaatsuunngitsoq, atuisartup KNR-imut oqaatigaa.

- Pakatsinartorujussuuvoq, tassami suliffeqaraluarluni ilaqutaraluarluniluunniit akunnerpassuit atorlugit Air Greenlandip malittarisassat piviusut malillugit qanoq iliuuseqarnissaa qarasaasiap saani atuaqattaartariaqarpoq , Marck Danielsen oqarpoq.

Taanna Nuummiit Københavniliarnermi kinguaattoorneq pissutigalugu siorna taarsiiffigineqarpoq.
 Marck Danielsenip nuliani meeqqanilu pingasut angalaqatigai. Ilaqutariillu akunnernik sisamanit sivisunerusumik kinguaattoorput.
 
Taamaammat ilaqutariit EU-mi malittarisassat naapertorlugit Air Greenlandimit taarsiiffigineqarnissamut pisinnaatitaaffeqarput.
 
Timmisartuutileqatigiiffiulli ilaqutariit pisinnaatitaaffigisaanit annikinnerusumik aallaqqaammut taarsiiffigeriarluarpai.
 - Københavnimiit Kangerlussuarmut angalaneruinnarmat 400 euro sisamariarlugu taamaallaat taarserniaraluarpaat.

Kangerlussuaq Københavnimiit 3.500 kilometeriunngilaartumik ungasitsiginerarlugu tassanilu kinguaattoortoqarneralugu Air Greenland tunngavilersuigaluarpoq.
Taarsiiffigineqarnissamulli apuuffissaviup sumiinneranit naatsorsuisoqarnissaa EU-mi malittarisat erseqqissaatigaat. Uanilu apuuffissaq Nuummiippoq.

AAMMA ATUARUK Kalaallit Nunaannut angalasut EU-mi eqqartuussummi ilaapput

Taamaaammat Marck Danielsenip inummut ataatsimut 600 euronik taarsiisoqarnissaa pisinnaatitaaffigaa, tamannalu Air Greenlandimut paasitippaa.
 
Air Greenlandilli eqqortumik taarsiissuteqarnissaq nammineq aallaqqaammut siunnersuutiginngimmagu isornartorsiorpaa.
 - Suummi pisinnaatitaaffiginerlugit paasiniarlugu oqaatsinut, malittarisassanut paragraffinullu tunngatillugu qaffasissumik ilinniagaqarsimanissaq pisariaqapajaarpoq, Marck Danielsen oqarpoq. 

    

AAMMA ATUARUK Henrik Steinbacher Air Greenlandip siulersuisuini siulittaasunngortoq