Henrik Steinbacher Air Greenlandip siulersuisuini siulittaasunngortoq
Air Greenlandip siulersuisui nutaamik siulittaasortaarput. Timmisartuutileqatigiiffimmi ataasinngormat ataatsimeersuartoqarnerani tamanna paasinarsivoq.
Allattoq Karsten Sommer
maajip 09-at 2018 06:59
Nutserisoq Mads Lynge
Maannamut siulittaasup Søren Lennert Mortensenip siulittaasutut tunuarnini Namminersorlutik Oqartussanut ukioq manna marsimi nalunaarutigaa, Namminersorlutik Oqartussanit toqqarneqarluni siulersuisunut ilaasortatut qinigaaqqissinnaanissani atorniarnagu.
Søren Lennert Mortensenip illunik tuniniaasarfini piffissaqarfiginerorusullugu Air Greenlandimi siulersuisunut ilaasortaajunnaarniarnini nalunaarutigaa, Naalakkersuisunngortussalli Air Greenlandip siulersuisuini piginnittumut sinniisumik nutaamik toqqaasinnaalernissaasa tungaanut ingerlaqqinnissaminut akuersisoq, Air Greenlandip tusagassiutinut nalunaarutigaa, juunillu aallartinnerani tamanna pinissaa naatsorsuutigineqartoq nalunaarutigineqarpoq.
AAMMA ATUARUK Air Greenland annertunerusumik sinneqartooruteqarpoq
Air Greenlandimi siulersuisut ukiumoortumik ataatsimeersuarneranni siulersuisut nutaat inissititerput, sulisut sinnerlugit ilaasortaatitaq Henrik Steinbacher siulittaasunngorluni.
Siulittaasup tullia tassaalerpoq Claus Holstein, danskit naalagaaffiannit toqqarneqartoq.
Air Greenlandip siulersuisuini ilaasortanngortut sinneri:
- Søren Lennert Mortensen, Namminersorlutik Oqartussanit toqqagaasoq
- Bodil Marie Damgaard, Namminersorlutik Oqartussanit toqqagaasoq
- Bjarne Eklund, danskit naalagaaffiannit toqqagaasoq
- Leif Rasmussen, SAS-imit toqqagaasoq
- Jan Torberger, SAS-imit toqqagaasoq
- Claus Motzfeldt, sulisut aallartitaat
- Sam Grønvold, sulisut aallartitaat
