Atuisunut Siunnersuisoqatigiit Kalaallit Nunaannut angalasut EU-mi eqqartuussummi ilaapput
Angalasut taakku pitsaanerusumik pisinnaatitaaffeqalernissaat EU-mi eqqartuussutip qulakkeereqataaffigigaa Danmarkimi atuisunut siunnersuisarfimmeersut qularutiginngilaat.
- Eqqartuussut angalasut eqqarsaatigalugit pitsaalluinnartuusoraarput, atuisunut siunnersuisarfimmi Tænkimi politikki pillugu siunnersorti Vibeke Myrtue Jensen oqarpoq.
Angalasut EU-p avataani mikkallarnermi kinguaattoortut taarsiivigineqarsinnaanersut EU-p malittarisassaani siusinnerusukkut erseqqissimanngilaq.
Tassa mikkallarnermi timmisartoq kinguaattoorpat taarsiivigitittoqarsinnaavoq.
AAMMA ATUARUK Kangerlussuaq inunnik ulluni tulliuttuni ulikkaassasoq
Atuisunut siunnersortit naapertorlugit angalanissamut inniminniineq tamakkiisoq pineqartillugu EU-mi malittarisassat apuuffissap tungaanut atuunnissaat qularutissartaqanngilaq.
- Kalaallit Nunaanni sumiikkaluaruilluunniit aqqutaani kinguaattoortoqarnerani, EU-mit peqqussut malillugu, taarsiivigineqarsinnaavutit. Tassa taarsiivigineqarnissamut nerisaqartinneqarnissamullu ilaatigut pisinnaatitaaffeqarlutit, Vibeke Myrtue Jensen oqarpoq.
Soorlu assersuutigalugu Københavnimiit Nuummut angalanermi angalaneq akunnernik sisamanik kinguaattoorfiuppat taava angalasoq Air Greenlandimiit 600 euronik taarsiivigitinnissamik pisinnaatitaaffeqarpoq.
Tamanna aamma atuuppoq Kangerlussuarmiit Nuummut angalanissaq kinguaattoorfiuppat.
Paasissutissat
Timmisartoq ilaaffissat apuuffissavinnut ima kinguaattooqqatigippat taarsiivigineqarnissamut pisinnaatitaaffeqarputit:
* Annerpaamik 150 km-isut ungasitsigisumut angalanermi akunnerit 3 (250 Euro)
* 1500 km-init ungasinnerusumut EU-p iluani angalanermi akunnerit (400 Euro)
* 1500-init 3500-ip tungaanut ungasissuseqartumut angalanermi akunnerit 3 (400 Euro)
* EU-p avataanut 3500 km-imit ungasinnerusumut angalanermi akunnerit 4 (600 Euro)
AAMMA ATUARUK Ilaasussat 850-it teknikkikkut ajoquteqarnermit eqqugaaqqasut
Timmisartortitseqatigiit itigartitsigajuttut
Timmisartortitseqatigiilli pisuussutiginngisaannik pisoqarpat malittarisassat atuutissanngillat.
- Timmisartortitseqatigiit pisut akisussaaffiginngippatigit taava taarsiissuteqarnissamut pisussaatitaanavianngillat. Timmisartorli ilaaffissat taamaatiinnarneqarpat kinguaattoorpalluunniit ingerlariaqqinnissamut ikiortussaavaatsit.
Taarsiivigineqarnissamut pisinnaatitaaffeqarsorigaanni taava timmisartortitseqatigiit saaffigineqaqqaassapput kingornalu isummerfigisussaavaat.
Atuisunut siunnersortit naapertorlugit itigartitsissut akueriinnarneqartariaqanngilaq.
- Timmisartortitseqatigiit itigartitsiinnarajupput, taakkununngami akikinneruvoq. Isumaqaruilli taarsiivigineqartariaqarlutit taava nunami aallarfigisannit oqartussaasunut naammagittaalliuuteqassaatit. Danmarkiminngaanniit aallaruit, Angallannermut, Sanaartornermut Ineqarnermullu Aqutsisoqarfik naammagittaalliuuteqarfigineqassaaq, Vibeke Myrtue Jensen oqarpoq.
AAMMA ATUARUK Norsaq suli timmisartuussisinnaanngitsoq
Air Greenlandip naammagittaalliuutit ullumikkut suliarigaangamigit angalaneq ataatsimoortoq apuuffissarlu isiginiartarai, Air Greenlandip sullitanut pisortaa, Helle Pedersen KNR-imut mailikkut allappoq.
- EU-miit malittarisassat atuuttut malillugit, apuuffissap qanoq ungasitsiginera taarsiiviginnissutip qanoq annertutiginissaannik aalajangiisuusarpoq. Uanga paasinninnera naapertorlugu eqqartuussivimmi aalajangerneqaqqammertoq Air Greenlandimut nutaajunngilaq.
Nutaamillu iliuuseqartariaqalissanerlutik nalilersueqqissaartuaannarlutik ilanngullugu allappoq.
EU-mi malittarisassat malilugit angalasut Air Greenlandimit taarsiiffigitinneqartarnersut, Air Greenlandimi tuniniaanermut pisortaq itilisiilluni nassuiaateqarnissaanik KNR-imit iluatsisinnaasimanngilaq.
Disko Linemulli ilaalluni angalaqqissagaanni EU-mi malittarisassat malillugit taarsiiffigitittoqarsinnaanngilaq, Disko Linemi aqqutigalugu angalassagaanni immikkut inniminniisoqartarpoq.
