Ilaasussat 850-it teknikkikkut ajoquteqarnermit eqqugaaqqasut

Teknikkikkulli ajoquteqarnera tamaanna killeqanngitsoq, Air Greenland tusagassiuutinut allappoq.

- Sullitatsinnut attaveqaqateqarnermut attaveqaatit atorsinnaannginnerat unammilligassani annerpaavoq. Angalanissanut pilersaarutinut iluarsiissutit pillugit SMS-it anngutinngitsoorput, skærmini nutarterinerit ersinngitsoorput aammalu Københavnimi, Kangerlussuarmi Nuummilu paasissutissiissutit nutartinngitsoorput imaluunniit naammanngitsoorlutik.

Suliffeqarfiup ilaasussarpassuit eqqugaasut ajuusaaruteqarfigai.

- Atorsinnaannginnerat ajuusaarnartorujussuuvoq akuersaarneqarsinnaananilu. Sullitanit kipiluttunartorsiortunit amerlasuunit saaffigineqarpugut, tamannalu pissusissamisoorluinnarpoq, attaveqaqatigiinnermut pisortaq Katrine Hjelholt Nathanielsen oqarpoq.

Air Greenlandip Norsamut kingoraartissat sisamanngormalli pissarsiarinialerpai, timmisartumillu allamik attartorniararneq iluatsinngilaq. Taamaammat kingoraartissaq pingaarutilik Københavnimukaanneqarpoq, taannali iluatsinngilaq.

Timmisartuutileqatigiiffik ulluni kingullerni ajornartorsiuteqaaluppoq. Air Greenlandip Jettime-imik aallartussaqalersikkaluarpaa, ilaasussalli tamarmik timmisartumut ikereeraluartut aallarnissaq taamaatiinnarneqarpoq. Tamatumani timmisartumik aquttumut piffissarititaasut angumerineqarsinnaasimannginnerat peqqutaavoq.

Air Greenlandip timmisartoq, Thomas Cookimeersoq attartorpaa taanna Manchesterimiit tallimanngornermi Kangerlussualiarpoq. Matumani ilaasussat utaqqisut Københavnimut apuussinnaanissaat qulakkeerneqassaaq.

Jettime Flymiit timmisartumik arfininngornermut attartortoqarpoq, Norsarlu arfininngornermi ullaap tungaa piareersimassasoq naatsorsuutigineqarpoq.