Assi: KNR

Naartulernissamut ajornartorsiuteqartoq: Taama aalajangertoqarnera ingasappoq

Rigshospitalimi mannimmik ikkussiffigitinnissamut neqeroorutip Naalakkersuisunit unitsinneqarnera meerartaarsinnaanngitsunik pisinnaatitaaffiiaaneruvoq. Naartunissaminik ajornartorsiuteqartoq aalajangernermut tupigusuttoq taama isumaqarpoq.

- Atuaqattaaqqaarlugu aatsaat qaratsannut pulavoq. Kaar, taava tupinnaruloorpoq, tupannarlunilu ingasallunilu taamatut aalajangertoqarnera, Ivalo Frank Larsen oqarpoq.

Nunatsinni naartulernissamut ikiorsiissutit naartulersitsinngippata peqqinnissaqarfiup Danmarkimi mannimmik ikkussiffigitinnissaq siornatigut akilertarpaa. Tassani naartulerusuttut angalaneq ineqarnerlu namminneq akilertarpaat.

Tamaniilli tamanna akissaqartinneqanngimmat, ilaat Danmarkimukartarsinnaanngillat. Neqeroorutigineqartoq taamaalilluni naligiimmik sullinneqarnissamut naapertuutinngitsoq Naalakkersuisunit neqerooruteqartarunnaarnermut tunngavilersuutigineqarpoq.

AAMMA ATUARUK Ilungersorneq pilluarnermik kinguneqarpoq

Ivalo Frank Larsen naggataamik Danmarkimi ikiorneqarnissaminut periarfissaqarpoq.

- Uanga misigivunga iluatsitseruloorlunga taamatut suli periarfissaqarama. Taava allat eqqarsaatigalugit meerartaarsinnaanani nammineq sakkortoreertigisoq, qanorli taamatut periarfissinneqarnani ajorunarpoq, Ivalo Frank Larsen oqarpoq.

Mannissap aqqutaatigut naartulertarsimanini peqqutigalugu Ivalo Frank Larsenip mannissaasa aqqutaat peerneqarnikuupput.

- Nammineq taamatut misigalugu, soorlu imaannaruloorpoq, naak arnaassuseq. Sooruna uanga taamatut aqqusaagaqartunga, Ivalo Frank Larsen qianaveersaatigaluni oqarpoq.

AAMMA ATUARUK - Kikkut tamarmik assigiimmik sullinneqartussaapput

Mannimmik ikkussiffigitinnissamut akit 25.000 koruuniniit 55.000 koruunit tungaanut akeqartarput. Ikkussiffigitinnerlu mannakkut nammineq akilertalertussanngormat Danmarkimut nuunnissaq eqqarsaatigaat.

- Uiga oqarfigaara massakkut iluatsinngitsuussappat Danmarkimut nuunnissarput eqqarsaatigisariaqarparput. Ilaa taamatut angalasaqattaarneq siumut utimullu akisoreertigisoq. Soormi Danmarkimut nuuginnarutta, Ivalo Frank Larsen oqarpoq.

Taanna Danmarkimi ikiorserneqarnissamut neqerooruteqartarunnaarnermut akerliussutsimik takutitsinissamut sulissuteqaqataavoq.

Tamarmik naligiimmik pineqalissappata, tassa ikiorserneqarneq angalaneq ineqarnerlu arnanut ukiumut 40-nut nunatta akilertalissappagu 5 millionit koruunit 6 millionit koruunillu akornanni akeqassasoq Naalakkersuisup oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat