Ilungersorneq pilluarnermik kinguneqarpoq
-Naartulerama eqqarsarsinnaanngilanga, inuuneq tupinnarnermik tassunga periasaarluni meerartaalersugut uigalu marluulluta, taama oqarpoq Gertrud Villadsen Nielsen.
Taanna naartulerumalluni Danmarkimi Rigshospitalimut pingasoriarluni angalavoq, angutip anisuuanik mannissaqarfimmigut inissiiffigitikkiartorluni. Aatsaallu sisamassaannik angalanermini anisuumik mannissanillu imertarfiusami minguerluakkami inerisaanikkut naartunissaa iluatsilluni.
Rigshospitalimi qitornartaarusuttut passutsittarfianni ukiuni kingullerni tallimani naammassineqartut:
2014: 8
2015: 7
2016: 7
2017: 5
2018: 6
Naartorusuttut Danmarkimut atortorissaarutit atorlugit naartulersinnaannissaannik ikiuineq unitsikkallarneqartoq, siusinnerusukkut oqaluttuaraarput. Tamanna Peqqinnissaqarfimmi malittarisassat atuuttut siunertaannut naapertuutinngittoqartarneranik peqquteqartoq, peqqinnissaqarfimmiit oqaatigineqarpoq.
AAMMA ATUARUK Naartorusuttut Danmarkimut misissortillutillu nakorsartikkiartortarnerat unitsikkallarneqartoq
Gertrud Villadsen Nielsenillu ullumikkut qaammatini tallimanngulersuni naartusup, naartulernissamimut aqqutaa oqittuinnaasimanngilaq.
Passunneqariartorlunilu angalasarnermini siullerni kisimiittariaqartarsimavoq. Aallarnissaminummi piffissap sivikittup iluinnaani paasitinneqartarpoq.
-Taakuninnga pingasoriarlunga soorunami kisimiikkama toqqissisimaffeqanngilanga, saaffissaqanngilanga, kisimiillunga pissanganerit, stressernerit sorpassuit aqqusaarpakka, Gertrud Villadsen Nielsen oqarpoq.
Meerartaarusuissimavorlumi:
-Annermik uanga sinngasarpunga meeraaqqamik takugaangama, sumiikkaluaraanngamaluunniit qiarusulersinnaasarlunga.
Kingullermilli nakorsiartussanngorami qaammatit marluk missaannik sioqqullugu paasitinneqarpoq, taamaalilluni uia ilaasinnaassimalluni.
Gertrud Villadsen Nielsen Danmarkimut misissortikkiartorlunilu katsorsartikkiartortarnermini angalanernut ineqarnermullu uinilu katillugit 100.000 koruunit missiliorlugit aningaasartuutigereerpaat.
