Nunasiniartunut gassimik qulliliornartumik igeriussisut

Inuit tamakkua tuusintinik arlalinnik amerlassuseqartut Kangianit Qiterlermeersuupput, Afrikameersuullutik Asiameersuullutillu. Taakku ilarpassui Syriamit qimaasuupput.

Nunasiniat qimaasullu aalassassimaaqisut Makedoniamut killeqarfikkoornissaat pinngitsoortinniarlugu, Makedoniamiut politiivisa assiaqutsersuutit ungerutissiat kapinartullit eqqaanni gassimik qulliliornartunik igeriussisaqattaarput. 

Qimaasorpassuit ingerlaartut tamaanngaanniit sapaatit akunnerini qaammatinilu kingullerni Serbia aqqusaarlugu nunamut EU-mut ilaasortaasumut Ungarnimut tassanngaanniillu nunanut EU-mut ilaasortaasunut Schengenimi isumaqatigiissut naapertorlugu killeqarfeqarfimminnik nakkutilliisoqanngitsunut ingerlaqqittarlutik.

Qimaasut 40 procentiisa Tyskland siunnerfigisarpaat, ukiormannalu aatsaat taama amerlatigisut, tassa 800.000-it apuunnissaat naatsorsuutigineqarluni. Inuit taama amerlatigisut sorsunnernit piitsuussutsimilluunniit qimaasut isumagisinnaanagit, Tysklandimi naalakkersuisut paaseqquaat.