Syriami pikitsitsisut nunami tassani ukiorpassuarni præsidentiusoq uppisinniaraat
Syriami naalakkersuisut sakkutuuisa pikitsitsisullu akornanni sakkuaannerit sakkortusiartuinnavinnerat pissutaalluni inuit 280.00-t missaat angerlarsimaffimminnit qimaasariaqarsimapput.
Tamat inuussutissaqarnissaannik Naalagaaffiit Peqatigiit pilersaarusiortui (WFP), ikiorsiissutinik agguaassisartut, taama ilisimatitsipput.
Syriami pikitsitsisut Syriami illoqarfiit annersaat marluk tiguarsimavaat, præsident Bashar al-Assadilu uppisinniarlugu.
Bashar al-Assad Syriami ukioq 2000-mili præsidentiuvoq. Taassuma angutaa Syriami præsidentitut toqunissami tungaanut ukiut 30-t issiavoq.
Bashar al-Assadimut akerliussutsimik 2011-mi takutitsisoqangaatsiartoqartalerpoq, naalagaaffiup inuisa imminnut sorsunnerannik tamanna kinguneqarluni.
Syriami pikitsitsisut Syriap avannarpasissortaani sapaatit akunnerata siuliani qoqassiillutik saassussipput.
Illoqarfissuaq Aleppo siullertut tiguarpaat, illoqarfillu Hama kingorna aamma tiguarlugu.
Pikitsitsisut Syriap avannaanit kujammut ingerlaalersut tallimanngornermi nalunaarutigineqarpoq, illoqarfiup Homsip tungaanut ingerlaarnerarneqarlutik.
