Naalakkersuisut siulittaasuata spiralilersuimaneq inuiannik nungusaaneruneraraa
Niviarsiaqqat arnallu 1960-ikkunni 1970-ikkunnilu danskit nakorsaanit spiralilersorneqarsimanerat inuiannik nungusaaneruvoq.
Taama naalakkersuisut siulittaasuat Múte B. Egede, DR-ip aallakaatitassiaani "Deadline-mi " apersorneqarnermini oqarpoq.
- Danskit naalagaaffiannit iliuuserineqarsimasoq inuiaannik nungusaaneruvoq. Maannakkut taama oqarneq tunngavissaqarpoq, taanna oqarpoq.
Maanna misissuisoqaleruttorpoq, soorlu aamma arnat 143-t danskit naalagaaffiat eqqartuussivilersuunnikuugaat.
Danskit naalagaaffiata inuttut pisinnaatitaaffinnik unioqqutitsisimanerarlugu arnat 143-t katillugit 43 millioninik koruuninik taarsiivigeqqupput.
Arnat eqqugaasimasut utoqqatserfigineqarnissaat tunngavissaqarluartoq, Múte B. Egedep DR-imut ilanngullugu oqaatigaa.
Spiralilersuisimanermi arnat niviarsiaqqallu 4500-t missaaniittut - ilaatigut 13-iniinnarnik ukiullit - amerlasuut akuersiteqqaarnagit spiralilersorneqarsimapput.
Spiralilersuisoqarsimaneranik maanna misissuineq maanna ingerlanneqartoq danskit naalakkersuisui aamma Naalakkersuisut akornanni isumaqatigiissutaasoq 2025-imi naammaasineqassangatinneqarpoq.
Naalakkersuisut 1992-ip kingornali spiralilersuisoqarsimaneranik aamma misissuititsipput. Misissuineq taanna ukiumi tullermi naammassineqassangatinneqarpoq.
