Sisimiuni napparsimmavimmut corona pillugu siarnnguttoqangaarmat oqarasuaat atassutaaruppoq, maannalu immikkut normumik pilersitsisoqarluni
Ippassaq ullaap tungaa Vivian Møller Johansen 77eriarluni Sisimiuni napparsimmavimmut sianeqattaarpoq.
Taanna naggussaminik niaqquminillu anniarlunilu kakkilertagami, coronamut misilitsikkusuppoq. Sisimiuni inuit sisamat marlunngormat coronamik tullatsissimasut paasineqareersullu, nappaat siammaakkiartulerpoq.
Vivian Møller Johansen piffissamik inniminniiniarluni napparimmaviup saaffiginnittarfiata normuanut sianeqattaareerluni oqaluussaqarami, nalunaaqutaq 13 sianeqqissinnaasoq oqarfigineqaannarpoq.
AAMMA ATUARUK Vivian Sisimiuni napparsimmavimmut iluatsinngitsumik 77-eriarluni sianertoq
Taannalu kisiartaanngilaq. Marlunngornermi siarnnguttoqangaarmat oqarasuaatit atorunnaarput, Sisimiuni nakorsaq, Helle Olsen oqarpoq:
- Oqarasuaatip corona pillugu saaffigiffissap ammanerata nalaani, inuit ajoraluartumik attavigisinnaanikuunngilaatigut. Misissortikkusuttut amerlangaarmata ulapittorujussuuvugut. Assorujussuaq ulapaartippaatigut, taanna KNRimut oqarpoq.
Siornatigut taama siarnnguttoqartiginikuunngilaq.
Corona pillugu oqarasuaatip normua napparsimmaviup ajoqusersimasunut nakorsiartarfianut inniminniinermi normup assigaa. Taanna normu aamma pinartoqartillugu sianerfigisassaavoq. Naatsumik oqaatigalugu: Saaffiginninnermi tamatigut - pinartuuppat pinartuunngippat - normu taanna atorneqassaaq.
- Inuit attaveqarfigisinnaasimanngimmatigut soorunami ajuusaarutigaarput, maannakkorpiarlu aaqqiissutissaqartinngilarput, Helle Olsen oqarpoq, nuannersumilli nutaarsiassiilluni:
- Pinartoqartillugu normu siornatigut atornikuusarput atoqqilerparput. Corona pillugu oqarasuaat ammagaangat, taanna sianerfigineqarsinnaasassaaq. Tassaana, corona pillugu oqarasuaammut siarnngullutik utaqqisut amerlavallaaleraangata, oqarasuaat atorunnaartartoq, Helle Olsen oqarpoq.
- Pinartoqartillugu normu tassaavoq 251611
- Taanna ammasarpoq 09:00-11:00 kiisalu 13:00-15:00.
- Saffiginnissutit nalinginnaat pillugit normu taanna atorneqassanngilaq. Pinarluinnartumik pisoqartillugu aatsaat normu taanna atorneqassaaq, Helle Olsen oqarpoq.
- Corona pillugu oqarasuaatip suli normoraa 86 42 11.
- Taanna ammasarpoq 9-10 kiisalu 13-14.
