Sydkoreap Præsidentia Ilulissanut tikippoq
Ilulissani timmisartunut mittarfimmi Præsident Lee Myung Bak Naalakkersuisut siulittaasuannit Kuupik Vandersee Kleist-imit Qaasuitsullu kommunia-ni borgmester-imit Jess Svane-mit tikilluaqquneqarpoq.
Præsident-i Kunngissaq Frederimmit danskillu avatangiisinut ministeiannit Ida Auken-imit ingerlaqatigineqarpoq. Kunngissaq Frederiup Sydkoreap Præsidentia ikinngutigilluarpaa.
Præsident-i taassumalu angalaqatai aamma kalaallit danskillu tikeraarnermut atatillugu angalaqataasut, Ilulissani mittarfimmit ingerlaannaq umiarsualiviliassapput, Ilulissat eqqaaniittumut Sermermiunut angalassallutik. Præsident-ip Sermermiut takorusuppaa silap pissusaata allanngornera pillugu soqutiginnikkami.
Lee Myung Bak-ip Kuupik Vandersee Kleist akunnittarfimmi Hotel Arctic-imi unnugu ataatsimeeqatigissavaa.
Suleqatigiinnissamik periarfissat suusinnaaneri pillugit oqaloqatigiissapput, ilaatigut soorlu silap pissussaa pillugu ilisimatuussutsikkut suliat aatsitassallu pillugit oqaloqaatigiissapput.
Kuupik Vandersee Kleist-ip Kalaallit Nunaata kissaatai issittumilu periusissat pingaarnersiorlugit saqqummiuppagit, Sydkoreap præsidentiata Kalaalit Nunaanni Issittumilu ineriartornerit paasisaqarfigissavai, ilaatigut inuttut atugassarititaasut avatangiiserlu.
Kalaallit Nunaanni aningaasaliiniissamut periarfissat oqallisigineqassapput, aama aatsitassanik uuliamillu ujaasinerit killifii aamma oqaluuserineqassallutik.
Uani maluginiarneqartussaavoq, Sydkorea nunarsuarmi nunat aningaasatigut ingerlalluarnerpaat 20attut inissisimammat.
Kuupik Kleistip Sydkoreallu præsident-iata ataatsimiinerat unnugu arfineq pingasunut qiteqquppat naammassineqassaaq. Ataatsimiinneq naammassippat isumaqatigiissutinik arlaqartunik atsioqatigiittoqassaaq, Sydkoreap Kalaallit Nunaatalu akornanni suleqatigiinnissamik ammaassisuussussat.