Sydkoreamiut nunatsinni aatsitassat takusalerpaat
Nunatsinni aatsitassanik piiasinnaalernissaq pillugu Myung-bak isumaqatigiissusiorniartoq allaaserineqarpoq.
Præsidenti malittaalu Ilulissanut septembarip ulluisa qulingiluaanni tikissapput. Aatsitassat qaqutigoortut, kanngussak, saviminissarlu pillugu isumaqatigiissusiortoqarnissaa ilaatigut pilersaarutaavoq.
Korea Kujalliup præsidentiata tikeraarnissaa Nunanut allanut tunngasunut pisortaqarfiup uppernarsarpaa.
- Pisuussutit assigiinngitsut pillugit, aatsitassat qaqutigoortut tassunga ilaapput, nunap atortulersugaanera, silap pissusaa, ilinniartitaaneq ilisimatusarnerlu Korea Kujalliup soqutigisarai, Nunattalu matumani suleqatigineqarnissaa soqutigalugu, Nunanut allanut pisortaqarfimmi allaffimmi pisortaq Mininnguaq Kleist oqarpoq.
Issittumi Siunnersuisoqatigiinni ilaasortanngornissaminut Korea Kujalleq aamma kissaateqarpoq.
Korea Kujallermi politikerit nuimasut Nunatsinnik aatsaat soqutiginnilinngillat. Korea Kujalliup nunanut allanut tunngasunut niuernermullu ministeria Kim Sun-Hwan Københavnimut ukioq manna januaarimi tikeraarpoq, Danmarkillu nunanut allanut tunngasunut ministeria Villy Søvndal nunarput pillugu paasissutissiivoq.