Kujataani ikerasaliuunneqarumapput

Imaatigullu aqqutit naannerulersinniarlugit isumannaannerulersinniarlugillu, Naalakkersuisut ikerasaliornissamik pisariaqartitsineq pillugu misissuissapput. 

Tamannalumi imaatigut angalasartut ilaasa pisariaqarluinnarnerarpaat.

- Sikorsuit tulakkaangata aqqutissaqalissagaluarpoq, ornitassat qanillissapput, benziinamik sipaartalissapput. Tassa tamakkua pissutigalugit sipinneqaruni ikerasaliarineqarluni ajussanngikkaluarpoq, Anda Jakobsen, sulinerminut atatillugu Qaqortumiit Aappilattumut angalasaqattaartartoq, taama oqarpoq.

Qaqortumiit Alluitsup Paanut imaatigut aqqut 50 kilometerit missaannik isorartussuseqarpoq. 

Aqqutaani ikerasaliarineqarsinnaasoq Itilliarsuk ikerasaliarineqartuuppat aqqut 19 kilomerit missaannik naannerulissagaluarpoq.

Aqqutaata naalinissaata saniatigut, aamma angalanneq isumannaannerulissasoq, Inatsisartuni siunersuuteqartoq erseqqissaavoq:

- Tassa Kujataani Qaqortup eqqaani angallanneq imarluttarnera sikorsuaqartarneralu pissutigalugit ilungersunartarpoq ukiup ilarujussuani. 

Inatsisartunut ilaasortaq Inuit Ataqatigiinneersoq Kelly Berthelsen taama oqarpoq itisiliillunilu: 

- Assersuutigalugu Itilliarsummi ikerasaliortoqartuuppat Nanortalimmiit Qaqortumut aqqut 19 kilometerit missaannik naannerulissagaluarpoq. Taavali imaq atoruminarnerujussuaq imarlutsillugu sikorsuaqartillugulu ammassagaluarluni. 

Itilliarsuup ikerasaliarineqarnissaanik Kelly Berthelsenip siunnersuutaa inatsisartuni oqaluuserineqarmat Nunatsinni ikerasaliarineqarsinnaasut amerlammata, ikerasaliornissamik pisariaqartitsineq pillugu Naalakkersuisut misissuissasut inerniliunneqarpoq.

Tamannalu Kelly Berthelsenip naammagisimaarnerarpaa.

- Alloriarnertut isigaara. Aamma soorunami Nunatta sinnerani Itilliarsuit Itillinnguit allallu amerlammata, taava Nunatsinni sumiluunniit oqilisaataasussaavoq. Kisianni soorunami uanga kujataamiutut nammineq neriuutigaara Itilliarsuk siulliunneqartunut ilaatinneqarumaartoq. 

Kujataani imaatigut angalajumatuut ilaat isumaqataavoq.

- Ajorissanngilara sipinneqarpat. Aamma uagut ornittakkagut qaninnerulaalissagamik. Suliartoraangatta ungasilaartaramik ingammik sila ajortillugu. Sipinneqartuuppat iluassagaluarpoq, Anda Jakobsen Jørgen Semionsenimut taama oqarpoq.

Naalakkersuisut misissuinissaminni aamma avatangiisinut sunniutaasussat ukiup tulliata tungaanut misissuiffigineqassallutik.