Svend Hardenbergip paarlatsissaata kinaanera saqqummiunneqangajalersoq

Tassami ataatsimiititaliap atorfinitsitsinissanik innersuussisartup innersuussutini Naalakkersuisunut tunniussimavaa, ataatsimiititaliamilu siulittaasup, naalakkersuisoqarfimmi pisortap Jørgen Isak Olsenip ataatsimiinnerup tulliani oqaluuserisassanut ilanngunneqarnissaa naatsorsuutigaa.

KNR-ip allakkatigut saaffiginnissutaanut akissummini taama allappoq.

Kina atorfinitsinneqassanersoq Naalakkersuisut aalajangertussaavaat.

Nunatsinni atorfilittat qullersaattut, Naalakkersuisut siulittaasuata naalakkersuisoqarfiani pisortanngortussaq, aamma pisortanngortussanut allanut ataatsimiititaliani siulittaasunngussaaq.

AAMMA ATUARUK Naalakkersuisoqarfinni pisortat soraarsitaajuartartut nunatta karsianut akisoqaat

Taamaattumik atorfik taanna inuttalerneqartinnagu, Naalakkersuisoqarfinni allani atorfinitsitsisoqarsinnaanngilaq, maannakkorpiarmi naalakkersuisoqarfiit arlallit pisortaqanngillat.

Namminersorlutik Oqartussani Naalakkersuisoqarfiit katillutik arfinillit maannakkorpiaq pisortaqanngillat, Nunatta Danmarkimi sinniisoqarfia aamma suli pisortaqanngilaq.

Naalakkersuisoqarfiit pisortaqanngitsut tassaapput, Siulittaasup Naalakkersuisoqarfia, Aningaasaqarnermut Naalakkersuisoqarfik, Aatsitassanut Naalakkersuisoqarfik, Ilaqutariinnermut, Naligiissitaanermut, Isumaginninnermullu Naalakkersuisoqarfik, Pinngortitamut Avatangiisinullu Naalakkersuisoqarfik aamma Peqqissutsimut Naalakkersuisoqarfik.