Peqqinnissaqarfiup ajutoornermut peqqut suli ujarpaa

Ippassaq qarasaasiat ajortumeerneri qitiusumik toqqorsiviup ingerlanerliulerneranik aallaaveqarpoq.

Kent Kleinschmidt taama oqarpoq, qarasaasianillu toqqorsiviit atukkatik namminneerlutik toqqorsiveqannginnerarlugit avataaniillu qarasaasianut toqqorsivinnik neqerooruteqartartut atortarnerarlugit.

Qitiusumillu toqqorsiviusup ingerlanerliulertarnera naliginnaasuunngitsoq Kent Kleinschmidtip ilanngullugu oqaluttuaraa.

- Tamanna qaqutigoorluinnartuuvoq. Qarasaasiammi atukkavut ukiuni sisamani ajutooratik ingerlareeraluarput, aatsaavissuarlu toqqorsiviit ingerlanerliulerneri misigalutigit.

AAMMA ATUARUK Nuummi peqqinnissaqarfiup qarasaasiai iluarsipput – nakorsiarniat takkutiinnarsinnaaleqqipput

Kent Kleinschmidt oqarpoq imalu naqissuseeqqilluni:

- Teknikki sunaluunniit qaqugukkulluunniit ajortittoorsinnaasarpoq. Ukiuli sisamat tamanna misiginngitsooraluarparput. Atortorissaarutimmi ajutooqqajaasut taarsersoqqammerpagut, taamaammallu qarasaasiap ajutoornera uagutsinnut qoqassiivissimalluni.

Qarasaasiakkut attavimmik neqerooruteqartartut Peqqinnissaqarfiup paasiniaavigileruttorpai ilaatigut qarasaasiakkut ilaannikkut ingerlanerliulitsiartarnera pisooqataanersoq paasiniarneqarluni - tassa software-ria ajornersoq, taamatullu pisoqaqqissinnaanersoq ilanngullugu paasiniarneqarluni.

- Ajutoornermut sunarpiaq pissutaanersoq suli paasinnginnatsigu ilumut taamatut pisoqaqqissinnaanersoq oqaatigiuminaappoq. IT-lerisutta toqqorsivinnik neqerooruteqartartuvut peqatigalugit susoqarpiarsimanersoq paasinialeruttorpaat, taakkuuppumi qarasaasiat ingerlarnginut tamanut immiussisartuusut.

AAMMA ATUARUK Peqqissaaveqarfiit qarasaasiaat iluarsipput