Nuummi peqqinnissaqarfiup qarasaasiai iluarsipput – nakorsiarniat takkutiinnarsinnaaleqqipput
![](/sites/default/files/styles/image_934x467/public/article_images/img_2351.jpg?itok=Bk4r8WgP)
Sisamanngornermi ullaap tungaani Nunatta annersaani qarasaasiap ajortumeernerata kingunerisaanik peqqinnissaqarfiit unittuueqqapput. Nakorsiarniallu taamaammat angerlarsimaannaqquneqarput, allaallu aatsaat ajutuuittoqartillugu saaffiginnittoqarsinnaalluni.
Nalunaaqutaq ualikkut ataasinngullartorlu Nuummi qarasaasiat iluarsisut nalunaarutigineqarpoq, nakorsiarniallu sisamanngornermi ualikkut piffissalerneqarsimasut takkutiinnarsinnaasut nalunaarutigineqarluni.
- Kikkut tamarmik ualeq manna nakorsiarnissamut piffissalerneqarsimasut, meeqqat misissorneqartussat akiuussutissanillu kapitittussat takkutiinnarsinnaalerput – aamma inortuigaluarussiluunniit, taama Dronning Ingridip peqqissaavianniit Facebook aqqutigalugu nalunaarput.
Nunattali sinnerani nakorsiartarfinni qarasaasiat suli ingerlallualersimanngitsut nalunaaqutaq 13.20 nalunaarutigineqarpoq.