Super Bowlimi pissartanngortut nalliussineranni aallaasersorneq assortuuttoqarneranik aallaaveqartoq
USA-mi amerikamiusut arsariaasiannik arsaattartut Kansas City Chiefsikkut pissartanngornerat illoqarfimmi tassani nalliuttorsiutigineqarmat aallaasersorneq inuit assigiinngitsut akornanni assortuuttoqarneranik aallaaveqarpoq.
Peqqarniisaarniartoqarneranillu taamaasilluni takussutissaqanngilaq.
Kansas Citymi politiit sisamanngornermi taama oqarput. Nutaarsiassaqartitsivik AFP taama allaaserisaqarpoq.
- Peqqarniisaarniarnermut allatulluunniit ingasaassiniarnermut tunngaveqartumut takussutissaqanngilaq. Inuit akornanni assortuuttoqarnerata kingunerisaanik aallaasersortoqalersimagunarpoq, politiit pisortaat Stacey Graves oqarpoq.
Arsaattartoqatigiinnik Kansas City Chiefsikkunnik tapersersuisut qimuttuitsut unittarfiannit Union Stationimit qimagutileruttortut aallaasersortoqalertoq, nutaarsiassaqartitsivik ABC allappoq.
Inuit 1 millionit missaat Kansas City Chiefsikkut pissartanngornerannut nalliuttorsiornermut peqataanissaat naatsorsuutigineqareerpoq, politiillu 600-t pisunik nakkutiginnittussanngortinneqarlutik.
Inuk ataaseq aallaasersornermi toqutaavoq, allallu 21-t ikilerneqarsimasutut nalunaarutigineqarlutik.
Meeqqat qulingiluat arfinillit 15-illu akornanni ukiullit ikilerneqarsimasutut nalunaarutigineqartunut ilaasut, nutaarsiassaqartitsivik BBC allappoq. Meeqqat taakku tamarmik aniguissangatinnerarneqarput.
