Sumiiffinni oqartussaaqataaneq nukittorsarnialerpaat
Kommunalbestyrelsimi ilaasortat maanna 21-upput, kommunimulli qinersereernerup kingorna 19-inngortinneqassallutik.
Sumiiffinni oqartussaaqataanerup nukittorsarneqarnissaa matumani anguniagaasoq, Kommuneqarfik Sermersuumi borgmesteri Asii Chemnitz Narup oqarpoq.
- Decembarimi ataatsimiinnitsinni tamanna aalajangerparput. Ima ilungersuutigitigivarput, ima ilumoorutsigivarput innuttaasut suli amerlanerusut oqartussaaqataallutillu sunniuteqarsinnaaqataanissaannut aqqutissiorusukkatta, allaat oqarluta taava uagut 21-ujunnaarluta kommunalbestyrelsimi ilaasortat 19-iinnanngorniarlik, avalequtitaartortissavarput oqartussaaneq aumiiffinni illoqarfinni lokalrådinik pilersitsiortornikkut, Kommuneqarfik Sermersuumi borgmesteri Asii Chemnitz Narup oqarpoq.
Lokalrådit taakku qanoq pissaaneqartigissanersut suli nalunarallarpoq, politikkikkulli oqartussaaqataallutillu sunniuteqassasut, Asii Chemnitz Narupip erseqqissaatigaa.
- Kommunalbestyrelsimi ilaasortat ikilissapput, taava tassunga tapiliullugillusooq lokalrådinik pilersitsissuugut, taava inuit illoqarfitsinni tassunga ibertinneqarumaartussat taakkua oqartussaaqataatinneqassapput illoqarfimmi illoqarfiupimmikkoortuani aalajangigassanut aalajangersimanerusunut, Asii Chemnitz Narup oqarpoq.
Sumiiffinni oqartussaaqataanerup nukittorsarneqarnissaa pillugu Qaasuitsup Kommuniani qangali suliniuteqartoqareerpoq, nukittorsarniarneqarnerali ilaatigut ajornakusoorsimasoq, borgmester Jess Svane oqarpoq, lokalrådini ilaasortat akissarsiassaat pillugit suli inatsisiliortoqarsimanngimmat.
Tamannali pillugu inatsisissatut siunnersuut Inatsisartut ukioq manna upernaakkut ataatsimiinnissaanni saqqummiunneqarumaarpoq, kommunit 2009-mi januaarip aallaqqaataaniilli kattussuunneqarmatali tamanna amigaataasimammat.
Lokalrådiliortoqassappat ilaasortat akissarsitinneqartarnissaat, Qeqqata Kommunianit Kommune Kujallermiillu tamanna ammaffigineqarpoq, kommunilli taakku marluk kommunimut qinersereernermut utaqqeqqaarniarput, lokalrådinik pilersitsisoqassanersoq pilersitsisoqassannginnersorluunniit qinikkat taamanikkussamut namminneq aalajangertussaassammassuk.
