Sulorarnermi GM-mi nikingassutit annikitsut aalajangiisuupput
Inuusuttut sulorarnermi misilittagartuunut unammillerluartalerput.
Tamanna arlaleriarluni malunnarsisarpoq sulorarnermi Nunatsinni pissartanngorniunnerup Nuummi illorsuarmi pisup ingerlanneqarnerani inuusuttut soorlu 17-nik ukiulik Maluk Lennert aamma 18-nik ukiulik Tina Amassen Rafaelsen B-67-meersut takutitsilluaqattaarmata.
Tina Amassen Rafaelsenilu aqqutaa tamaat iluatsitsigami arnat inersimasut ataasiakkaarneranni pissartanngorpoq sættini marlunni Cecilie Josefsen ajugaaffigigamiuk.
Angutit inersimasut ataasiakkaarneranni Jens Frederik Nielsen pissartanngoqqippoq Nikki Eriksen Nathansen Qaqortumi Tennisklubbenimeersoq sølvinnattoq.
Nikki Eriksen Nathansen aamma Maluk Lennert pissangaqisumik semifinalemi tallimanngornermi tannaartumi unammipput sættit pingajuat aqqusaaqqaarlugu ajugaasussarsimmata. Maluk Lennert aamma bronzennanniunnermi sættini pingasuni unammivoq tassanilu Henrik Jensen B-67-meersoq ajugaavoq.
Arnat angutillu akuleriillutik iligiiaarneranni inersimasuni finalertut tamarmi JBF-meersuupput tassaasut Frank Bagger aamma Malu Degn Karl Jakob Thomassen aamma Sandra Bro-mut unammipput. Tassani Bagger aamma Degn ajugaasuupput.
Angutit inersimasut iligiiaarneranni ajugaasuupput Jens Frederik Nielsen aamma Sequssuna Fleischer Schmidt B-67-meersut Henrik Jensen aamma Michael Kleist B-67-meersut ajugaaffigalugit. Sættilli pingajuanni aatsaat pissartanngorneq qulakkeerneqarpoq.
Arnat inersimasut iligiiaarneranni Tina Amassen Rafaelsen aamma Karolina Josenius B-67-meersut unammivaat Sandra Bro aamma Malu Degn JBF-meersut. Sættit pingajuat aqqusaaqqaarlugu pissartatut Tina Amassen Rafaelsen aamma Karolina Josenius ujamilerneqarput.
