Sullivinnik nakkutilliisoqarfiup suliniutit angisuut piareersimaffigai
Mette Frederiksenip ataatsimiinnermi paasissutissiissutigaa suliniutinut angisuunut tunngatillugu annertunerusumik suliassaqalernissaa danskit tungaannit eqqumaffigineqartoq. Ministerittaaq paasissutissiissutigaa tassunga atatillugu aningaasanik amerlanerusunik pisariaqartitsisoqarnissaa danskit eqqumaffigigaat.
-Ataatsimiinnerput iluarisimaartupilussuuara. Kalaallit Nunaanni suliniutinut angisuunut tunngatillugu Danmarkip akisussaaffeqarfimmini piareersaatai pillugit allakkatigut akissutigineqartut ersernerluttupilussuupput, ministerilli maanna oqaatigisai ersarissupilussuullutik. Suliniutinut angisuunut atatillugu sullivinnik nakkutilliinermut danskit akisussaanerat isumagineqassaaq - tamannalu suliamut paasisimasaqarluartumik aarlerinanngitsumillu, Danmarkimilu periaatsit atorneqartut assingalugit ingerlanneqassalluni - aamma ullumikkumut naleqqiullugu akisunerussagaluarpalluunniit, Doris Jakobsen Mette Frederiksenimik ullumi ataatsimeeqateqarnermi kingorna taama nassuiaavoq.
Mette Frederiksenittaaq erseqqissarpaa Kalaallit Nunaanni sullivinnik nakkutilliisoqarfiup eqeersimaarluni suliniuteqarnissaa ersarissumik kissaatigisimallugu. Nakkutilliisoqarfiup Danmarkimi suliaanut tamanna naapertuuttumik ingerlanneqassaaq. Kalaallit Nunaanni suliniutinut angisuunut tunngatillugu suliassat tamakkiisumik isigineqarsinnaanngitsutut isiginngilai imaluunniit naalagaaffeqatigiit sinnerani piumasaqaatinut pioreersunut allaanerusutut isiginagit.
-Suliniutit piviusunngortinneqariarpata aningaasartuutitassartai isumagineqarumaarput, piginnaasat eqqortut pissarsiarineqarlutik sulisussallu pisariaqartinneqartut isumagineqarlutik. Tamannalu Naalakkersuisunik qanittumik suleqateqarluni pissaaq. Pissusissamisut ingerlavoq, aamma danskit naalakkersuisuinik pitsaasumik suleqateqarnitsinnik ersersitsiinnarpoq, Doris Jakobsen, Kalaallit Nunaanni sullivinnik nakkutilliisoqarfiup suliaanik nakkutiginneqqulluni ministerimit peqquneqarsimasoq, oqaluttuarpoq.
