Sullivinnik Nakkutilliisoqarfik ukioq manna arfinileriarluni sulinermut inerteqquteqartoq
Nunatsinni sulliviit isumannaallisaanermik qulakkeeriuaannartanngillat.
Sullivinnik Nakkutilliisoqarfik arfinileriarluni sulinermut inerteqquteqartariaqarsimasoq Sullivinnik Nakkutilliisoqarfiup 2019-imi nalunaarusiaani allagaatinik takunninniarnermi pissarsiarineqarsimasuni allassimavoq. Tamatumami inerteqqutigisimasai tamarmik sulisut isumannaallisaatinik pinngitsooratik atugassaminnik atoratik sulisimanerannik pissuteqarput.
Inerteqqutigisimasaa uissuumminarnerpaaq suliffeqarfiup MT Højgaardip Nuummi sanaartorfianut attuumassuteqarpoq, tamatumani betonngilerisoq quleriinnik initalinnik sanaartukkami 23 meterisut portutigisumi majuartarfinniitilluni qajannaallisaasimammat.
Majuartarfiit init quleriit arfineq-pingajuannut inissinneqarsimapput. Sulisoq qiterutaasamik isumannaallisaatilersimanngilaq, nakkariataarnissaanulluunniit isumannaallisaatinik qassutaasanik assigisaanilluunniit navianaallisaasoqarsimanngilaq. Taamaattumik qaqqajunnamut nakkarsimasinnaavoq, Sullivinnik Nakkutilliisoqarfik taama allappoq.
MT Højgaardip nassuerutigaa suliaq ajuusaarnartuusoq, malittarisassalli naapertorneqarnissaannik sapinngisamik aamma qulakkeerinninniarnerartarpoq.
- Sulisuvut isumannaallisaatinik atuinermik ilitsersuuttarpavut. Ilitsersuinivullu sulisutsinnit ajoraluartumik tamatigut malinneqartanngillat. Sulisup taamaaliornissi taamanikkut isumassarsialatsiaasorisimavaa. MT Højgaardimili suleqatiminit qalloqquneqarnikuunngilaq, MT Højgaardip immikkoortortaani ingerlatsisoq Steffen Sloth oqarpoq.
AAMMA ATUARUK Qeqqata Kommunia inerteqqummik tunineqartoq
Pipallannerullunilu kanngutsinnarpoq
Sullivinnik Nakkutilliisoqarfiup 2019-imi inerteqqutai:
- Permagreen Maniitsumi apriilip 30-at:
Sulisoq Grønlandsbankenip qaliani 5 meteriniit 8 meterisut portutigisumi suliaqarpoq. Taassuma bankip iigaa anorimut illersuutilersorpaa. Qaliani suliaqarnerani nakkaratarnissaanut navianaallisaasoqarsimanngilaq.
- Arctic Cleaning Service Nuummi maajip 28-at:
Arctic Cleaning Servicemi sulisoq Hotel Hans Egedep qaliaasaani 3,5- meteriniit 4 meterisut portutigisumi igalaanik qillersaavoq. Sulisoq isumannaallisaammik qiterutaasaqaraluarpoq, suleqataali igalaap tulliata eqaani nikorfavoq. Taassuma qitequtaasaq paaraa, igalaanillu qillersaasoq nakkaratassagaluarpat suleqatini tigoriartaarnissaanut piareersimavoq.
- Qeqqata Kommunia Kangaamiuni juunip 24-at:
Sulisup suleqatini nivaataateeqqap qalutaassuanik illup qalianut kivippaa. Kivinneqartoq 4-5 meterisut portutigisumiillunilu qalutaassuup illullu qaliata akornannut kiggigussaaratarsimasinnaasoq nalunaarusiami allassimavoq.
- MT Højgaard Nuummi juunip 26-at:
Betonngilerisoq quleriinnik initalinnik sanaartorfimmi 23 meterisut portutigisumi majuartarfinniitilluni qajannaallisaavoq. Taanna isumannaallisaasersorsimanngilaq, qaqqajunnamullu tulluni nakkaratarsinnaasimavoq.
- BS-Montage Aps Nuummi aggustip 30-at:
Inuit pingasut nakkaratarnissaminnut isumannaallisaateqaratik - ungallunik navianaallisaasersorneqanngitsumi qiterutaasanilluunniit isumannaallisaasersorsimanatik - sanaartorfiup qaani 7,5 meterisut portutigisumi sulipput.
- HP Byg Nuummi septembarip 16-iat:
Sulisoq sanaartorfiup qaata isuani 9-10 meterisut portutigisumi nikorfavoq. Sanaartorfimmi nakkarataannaanissaanut ungallunik assiaqutinilluunniiit navianaallisaasoqarsimanngilaq, sulisorlu taanna isumannaallisaammik qiterutaasaqarani.
Suliat allagaatinik 2019-imi januaarip aallaqqaataaniit oktobarip aallaqqaataanut takunninniarnermi pissarsiaapput.
Sullivinnik Nakkutilliisoqarfiup inerteqquteqartarnera iliuuserisinnaasaani sakkortunerpaavoq, tamannalu politiinut unnerluutiginninnermik kinguneqarsinnaasarpoq. Inunnik mianersuaalliortitsisoqarsimatillugu inerteqquteqartoqartarpoq, isumannaallisaasoqarsimanissaanillu qulakkeerisoqarsimatinnagu sulineq nanginneqaqqusaanngilaq. Kukkunerit amerlanerpaartai aaqqiissuteqarfigineqa-pallassinnaasarput.
Inuit pingasut isumannaallisaatinik atortoqaratik sanaartorfiup qaani 7,5 meterisut portutigisumi sulisimasut suliami sanasut suliffeqarfiutaannut BS Montagemut tunngasumi pineqarput.
Tamanna pipallanneruvoq, Brian Sørensen BS Montagemik piginnittoq sanaartorfiullu pineqartup qaani suleqataasimasoq ilaat isumaqarpoq.
- Sanaartorfiup qaavata qeqqani suliaqaratta ulorianartoqarneranillu eqqarsaateqannginnatta isumannaallisaatinik qiterutaasanik qummukaassaqanngilagut, malittarisassalli soorunami malittussaavagut, Brian Sørensen oqarpoq, oqaatigaalu ajornartorsiut qiterutaasanik aallernermikkut iliuuseqarfigisimagitsik.
Nalunaarusiani suliat sanaartorfinni sulisut isumannaatsuunissaannut tunngasut annerusumik eqqartorneqaraluartut eqqiaanermik suliffeqarfik aamma pineqarpoq.
Arctic Cleaning Servicemi sulisoq Hotel Hans Egedep qaliaasaani 4 meterisut portutigisumi igalaanik qillersaavoq. Sulisoq isumannaallisaammik qiterutaasaqaraluarpoq, suleqataali igalaap tulliata eqaani nikorfavoq. Taassuma qiterutaasaq paaraa, igalaanillu qillersaasoq nakkaratassagaluarpat suleqatimi tigoriartaarnissaanut piareersimavoq.
- Tamanna soorunami naammaginanngilaq, Arctic Cleaning Servicemi pisortaaneq Thomas Bang oqarpoq.
Pisortap suliaq kanngutsinnartuunerarpaa, oqaatigalugulu taama pisoqareersorlu Arctic Cleaning Servicep sullitani ilisimatitsissimagaa isumannaallisaanermut malittarisassat sullivigisaminni naapertorsinnaanngimmatigit suliassiissutigineqartoq naammassisinnaanngikkitsik.
Sullivinnik Nakkutilliivik inerteqquteqartarnermi saniatigut suliani annikinnerusuni peqqussuteqarsinnaallunilu ilitsersuisinnaavoq. Qisuariaataalu ukiumut 500-it missaanniittarput.
