Qeqqata Kommunia inerteqqummik tunineqartoq

Qeqqata Kommuniani sulisoq sulitilluni nivaataateeqqap qalutaassuani nikorfasoq nivaataateeqqanillu illup qalianut qaqinneqalersoq Sullissivinnik Nakkutilliisoqarfimmeersumit naammattoorneqareersorlu Qeqqata Kommuniata tamanna uppernarsivaa.

Sullivinnik Nakkutilliisoqarfimmeersup Qeqqata Kommuniata Kangaamiuni suliaqarfigisaanut puttuteriasaarnera Qeqqata Kommunianut akunnattoornartumik kinguneqarpoq.

Nakkutilliisup pisorujoornermini inuk nivaataateeqqap qalutaassuani nikorfasoq nivaataateeqqamillu illup qalianut qaqinneqalersoq juunimi naammaattoorsimavaa.

Qeqqata Kommuniami ajornartorsiuteqarsimavoq. Erfalasummi illup qalianut nivinngarneqarsimapput peerneqaqqigatillu. Taamaattumik erfalasut peernissaannut suliassinneqarsimavoq.

Erfalasut illup qaliani 4-5 meteritut qutsitsigisumi nivingapput. Kommunimili sulisup aappaa aalajangersimavoq, suleqataata majuartarfikkoorani nivaataateeqqanilli kivinneqarnermigut erfalasut angussagai.

Sulisup aappaata taamaaliornissaminnut akuersisimavoq, taamaattumillu nivaataateqqaanik kivinneqarluni illup qalianut qaqeriarluni erfalasut peersimavai tamatumalu kingorna aqqarneqarluni.

Sullivinnik Nakkutilliisoqarfimmeersoq pisumut takunnittoq isumaqarpoq sulisut naammattuukkani eqqunngitsumik suleriuseqarsimasut.

Taamaattumik sulisut oqaloqatigeriarlugit nalunaarusiorsimavoq, nalunaarusiaanilu allassimavoq inuk nivaataateeqqap qalutaassuaniinnermini nakkaratarsimasinnaasoq imaluunniit qalutaassuup illullu akornannut kiggigussaaratarsimasinnaasoq. Sullivinnik Nakkutilliisoqarfiup nivaataateeqqani aquttoq kommunip nivaataateeraanik ingerlatseqqusaasimanera isornartoqartippaa, aquttormi taama pisoqarmat sapaatit akunnera ataasiinnaq matuma siorna kommunimi sulilersimanera eqqarsaatigalugu taakkuninnga ingerlatsinermik misilittagakittutut nalilermagu.

Taamaattumik Qeqqata Kommunia inunnik nivaataateeqqat atorlugit kivitsinermut inerteqqummik tunineqarpoq.