Sullivinni avatangiisinik isumannaallisaaneq suliffeqarfiit akilissagaat

Sullivinni avatangiisinik isumannaallisaaneq Danmarkimiit Nunatta tigussappagu, Nunatsinnit suliffeqarfiit akilissagaat, Naalakkersuisut nassuiaasiaminni nutaami siunnersuuteqarput.

Taamali ilusilersuineq Sulisitsisunik isornartorsiorneqarpoq.

Sullivimmi nakkutilliinermi aningaasartuutissanut atugassanik suliffeqarfiit akitsuutinik pingitsaaliissummik nunatta karsianut akiliissasut, Inuussutissarsiornermut, Suliffeqarnermut Niuernermullu Naalakkersuisoqarfiup nassuiaammi nutaami siunnersuutigaa.

Tamaattoqalissaaq suliffimmi isumannaallisaanermut akisussaaffik Danmarkimiit Nunatta tigussappagu.

Tamannali Sulisitsisuni allattoqarfimmi pisortamit Karsten Klausenimit isornartorsiorneqarpoq.

- Inuussutissarsiummik ingerlatsisut ullumikkut akeqanngitsumik pisartagaannut nutaamik aningaasartuuteqalernissaq isumassarsiatsialaanngitsoq isumaqarpugut. Suliffimmi isumannaallisaaneq inuussutissarsiummik ingerlatsisut kisimik iluaqutineq ajoraat aamma oqaatigisinnaavarput, inuiaqatigiinnut tamanut iluaqutaasuuvoq, taamaammat akileraarutitigut tamanna aningaasalersorneqartariaqarpoq, Karsten Klausen KNR-imut oqarpoq.

Sullivinni isumannaallisaaneq sullivimmilu avatangiisinut tunngasunik sulisut ilinniartinneqarnerat nunatta nammineq tiguppagu tamanna naatsorsuinerit naapertorlugit nunatta karsianut 10,7 milliuunit koruuninik naleqassaaq.

Kisianni imaanngilaq akiligassaq suliffeqarfinnut ingerlateqqikkaanni, tamanna iluanaarutaassasoq, Karsten Klausen oqarpoq.

- Tassami suliffeqarfiit qaavatigut akiligassaqalissapput, taamaammallu akit qaffassapput. Sanaartorneq akisunerulissaaq pisiassallu akitsussallutik. Tamannalu inuiaqatigiinnut nunattalu karsianut naggataatigut eqquissaaq.

Namminersorlutik Oqartussat naapertorlugit akisussaaffimmik tigusinermi sulisut amerlanerusut sullivimmi upalunngaarsimanmut ilinniartinneqassammata,
sullvinni ajutoortarnerit ikilissasut.

Sullivinnili isumannaallisaanerup nunatsinnit akisussaaffigineqalernissaannut maannakkut piffissaanngitsoq Sulisitsisut isumaqarput.

- Sullivinni isumannaallisaanerup tigunissaa pinnagu, suliassaqarfiit allat tigoriikkat, soorlu isumaginninnermut meeqqallu atuarfianut tunngasut, iluamik ingerlalernissaat sammineqarnerulertariaqartut isumaqarpunga. Tamakku iluamik ingerlalerseqqaartigit, GE-miit Karsten Klausen oqarpoq.

Nassuiaat naapertorlugu, naalakkersuisut pilersaarutigaat, sullivinni isumannaallisaanermut inatsit, tamatuminngalu angerlartitsineq Inatsisartuni aappaagu 2017-imi upernaakkut suliarineqarumaartut.

Pilersaarut naapertorlugu suliamik tigusivinnissaq 2018-imi pissaaq.