Sulisitsisut Naalakkersuisut Ruslandimut mattussisinnaanngorsinissaannut tapersiisut

Ruslandimut mattussisinnaanngorsinissaq politikerinit amerlanerussuteqartunit tapersersorneqarluarpoq, Sullitsisuniillu nunatsinniit raajanik aalisakkanillu tunisisarunnaarnissaq aamma taperserneqarpoq.
- Soorunami nunatsinnut aamma sunniuteqarpoq. Suliffeqarfippassuit suliffiit attanneqaannarnissaat anguniagaraat, Sulisitsisut pisortaat oqarpoq. Assi © : KNR
Allattoq Malik Brøns, Aviâja Kilime
maajip 20-at 2022 14:59

Naalakkersuisuniit siunnersuut Inatsisartuni nukingisaarutaasumik immikkullu ittumik sisamanngormat suliarineqarpoq. Siunnersuut politikerinit taaseqataasunit 20-nit tamanit  akuerineqarpoq. Siunnersuut pineqartoq tassaavoq Ruslandimut mattussisinnaanngorsinissaq.

Rusland inatsisinik unioqqutitsilluni Ukrainemut februaarip 24-annili saassussisaqattaareersorlu tamanna siunnersuutigineqarpoq. EU nunallu killii allat Ruslandimut tamatuma kingorna assigiinngitsutigut mattussisareerpoq.

Maannalu Naalakkersuisut Ruslandimut aalajangersimasunik aamma mattussisinnaanngorput, qanorli mattussiniartoqarnersorli suli aalajangiisoqanngilaq. Taamaattumik Naalakkersuisut qanoq annertutigisumik mattussiniarnerlutik naamminneq aalajangiisinnaalerput.

Soorlu aalisakkanik qaleruallinnillu nunatsinneersunik Ruslandimut tunisisarneq unitsinneqarsinnaavoq. Nunatta aalisakkat qaleruallillu avammut tunisaasa 13 – 14 procentii Ruslandimut tunineqartarput. Tassa Ruslandimut 2021-mi 580 millionit koruuninik naleqartunik ataatsimut tunisaqartoqarpoq.

 

Nunatta aalisakkat qaleruallillu avammut tunisaasa 13 – 14 procentii Ruslandimut 2021-imi tunineqarput.

 

Tamannalu Sullitsisut ilaasortaannut sunniuteqarnissaa akueriinnartariaqassasoq, Sulisitsisut pisortaat, Christian Keldsen oqarpoq, taassumalu suliffinnik annaasaqartoqaratarsinnaanera taassuma naatsorsuutigaa.

- Soorunami nunatsinnut aamma sunniuteqarpoq. Suliffeqarfippassuit suliffiit attanneqaannarnissaat anguniagaraat.

Christian Keldsenilli inuussutsissarsiuteqartut mattussisoqarneranut naleqqussarnissaat naatsorsuutigaa. Assersuutigalugu Royal Greenlnadip Ruslandimut niuernini marsip aallartinneranili unitsereernikuuaa.

- Sulisitsisut nunatta nunat killiisa kinguneqartitsissutaannik tapersiisera tapersersortuaannarpaa. Kinguneqartitsissutaasullu qaammatini arlalinni maanna atuupput. Suliffeqarfiit pikkorissut tatigilluinnarpakka, isumaqarpungalu aaqqiiniarlutik iliuuserisaat ajunngilluinnartuusut. 

Ruslandimut pillaatitut iliuusissat ilaaffigilerneranni suliffissat ilaannik annaasaqarnermik tamanna kinguneqarnissaa ilimanartoq, Isumaginninnermut Suliffeqarnermullu Naalakkersuisoqarfik Inatsisissatut siunnersuutip nassuiaataani paasissutissiivoq.

Aamma atuaruk