Suliumanngikkuit ikiorsiissutit unissapput
![](/sites/default/files/styles/image_934x467/public/article_images/royal_greenland_april_2010_redigeret_2_4.jpg?itok=DJMZAJWg)
Aasaq aalisarlualeruttorfiup nalaani aalisakkeriviit sulisussaaleqileraluarput. Taamali pisoqarnerani Qaasuitsup Kommuniani suliffissaaleqisutut allatsissimasoqarpoq. Taama pisoqarnerani sulisussaaleqineq pissutigalugu qaleralinnik tunisinerup unikkallarnera Halibut Greenlandimut ullormut 1 millioner koruuninik annaasaqaataavoq.
Taama pisoqarnera Inatsisartut ukiaanerani katersornerminni oqaluuserisussanngorpaat.
Demokratineersoq Anda Uldum siunnersuuteqarpoq suliffissamik innersuunneqaraluarlutik suliumanngitsut pisortanit ikiorsiissutinik pissarsisarnerat sapaatit akunnerini sisamani unitsinneqartassasoq.
- Imaanngilarmi suliffissaqartillugu sulisinnaalluaraluartut pisortat ikiorsiissutaannik nappateqassasut suliumannginnertik pissutigiinnarlugu, Anda Uldum siunnersuumminik tunngavilersuivoq.
Oqaluuserisaq taanna pillugu Kattusseqatigiit Partiianneersoq Knud Fleischer apeqquteqaat tunngavigalugu oqallittoqarnissaanik siunnersuuteqarpoq.
Taassuma kissaatigaa pisortanit ikiorsiissutit tunniunneqartarnerannut malittarisassat naapertuunnersut oqaluuserineqassasoq.
- Ilumoorsinnaanngilarmi inuit nammineerusuttut aammalu suliffissaaleqisut amerlingaluttuin-narfianni, fabrikkit ilaat sulisussaaleqineq pissutigalugu matusariaqartarsimappata imaluunniit tunisassiassat killeqareeqisut sulisussaqannginneq pissutigalugu asiutiinnarneqartassappata, Knud Fleischer oqaluuserisassatut siunnersuuminut tunngavilersuivoq.
Inatsisartut katersornerat septemberip 21-at aallartissaaq.